اطلاعات روز: هلمند کې ځايي سرچينې وايي، چې د دې ولایت په موسی کلا ولسوالۍ کې «نامعلومو وسله والو» د یو دولتي روغتون ډاکټر په ډزو وژلی او له هغه څخه یې د دې روغتون د نور پرسونل تنخواوې وړي دي.
یوې سرچینې د نوم نه یادولو په شرط وویل، چې پیښه تيره شپه (دوشنبه، ۲۷ د کب) د موسی کلا ولسوالۍ اړوند «کڅ» نومي روغتون کې رامنځته شوې.
سرچينه زیاتوي، چې د حمدالله ستانکزي په نوم دغه ډاکټر د لښکرګاه ښار څخه د ياد روغتون د پرسونل تنخواوې وړې وې، ترڅو سبا لار یې ټولو ته وویشي، خو دشپې مهال پرې «نامعلومو وسله والو» برید کړی او د دې د وژلو ترڅنګ یې ټولې پیسې وړي دي.
یوې بلې سرچینې بیا وویل، چې دغه ډاکټر شاوخوا ۶۶ کاله عمر درلود او د تېرو لسو کلونو راهیسې یې هلمند کې په روغتیایي برخه کې کار کاوه، چې د دې پیښې پرمهال په روغتون کې یوازې و.
د سرچینې په وینا، چې حمدالله ستانکزی د عمومي داخله ناروغیو معالج و او په ډیرې بې رحمۍ وژل شوی دی.
د دې پیښې د څرنګوالي او د وسله والو له لوري د وړل شویو پیسو د اندازې په اړه معلومات نه دي ورکړل شوي.
هلمند کې د طالبانو ځایي مسوولینو تر اوسه په دې تړاو څه نه دي ویلي.