اطلاعات روز: په ننګرهار کې ځایي سرچینې وایي، چې په دغه ولایت کې د طالبانو اطلاعاتو او کلتور ریاست د سیمه ییزو رسنیو له مسوولینو په ټینګار سره غوښتنه کړې، چې د دوی لاسته راوړنې او پرمختګونه دې په سم ډول خپاره کړي.
په دغه ولایت کې یوې باوري سرچینې د نوم نه خپرولو په شرط وویل، چې تېره ورځ (یکشنبه، ۱۱ د غبرګولي) د ننګرهار د اطلاعاتو او کلتور ریاست لپاره د طالبانو د اطلاعاتو امر مولوي صدیق الله قریشي د یوې خصوصي راډیو دفتر ورغلی او د خپرونو په محتوا کې ېې پر بدلون ټینګار کړی او دغه راز یې د هغه خپرونو سملاسي بندېدو غوښتنه هم کړې چې په ژوندۍ بڼه خپریږي او نجونې په کې تیلیفوني اړېکې نیسي.
سرچینه زیاتوي، چې نوموړي دغه راز د رسنیو له ټولو کارکوونکو غوښتي چې ږېرې پرېږدي او خولۍ پر سر کړي.
د سرچینې په خبره د اطلاعاتو او کلتور ریاست امر کړی چې ښځینه خبریالانې به نور د نارینه سرپرست پرته خپلو کاري ځایونو ته نه شي تلای او دغه راز دوی لا هم د نارینه همکارانو سره نه شي کولای یو ځای خپرونې پرمخ یوسي.
سرچینې وویل: «د اطلاعاتو او فرهنګ ریاست استازی قریشي بدلون د ځینو ادبي او تفریحي خپرونو د بندېدو او پر ځای یې د دوی په ګټه د خپرونو د رامنځته کېدو غوښتنه وکړه او ټینګار یې وکړ که هره رسنۍ د حکومت له پالېسۍ خلاف خبر یا خپرونې نشر کړي، نو بیا به یې ځای زندان وي.»
د سرچینې په خبره د طالبانو له واکمنېدو راهېسې رسنۍ په جدي توګه زیانمنې شوي او د لګول شویو محدودیتونو له امله د رسنیو د محتوا کیفیت او کمیت د پام وړ له منځه تللی دی.
سرچینه زیاتوي، رسنۍ په بشپړه توګه خپلواکي نه لري او په سیستماتیک ډول د طالبانو تر سانسور لاندې دي.
یوه بله سرچینې هم تاییدوي چې د اطلاعاتو او کلتور ریاست یاد استازی په دغه ولایت کې په زیاتره رسنیو د څار په ډول ګرځېدلی او ترې غوښتي یې دي، چې په خپرونو کې دې د دوی په ګټه تبلیغات وکړي.
سرچینه زیاتوي، چې د رسنیو اقتصادي ستونزو سره سره د طالبانو له لوري محدودیتونو لګولو او اطلاعاتو نه شریک کولو، د رسنیو د محتوا پر کمیت او کیفیت منفي اغېز کړی دی.
سرچینې وویل: «ټولو رسنیو ته یې خبرداری ورکړی که څوک د دوی په ګټه تبلیغات ونه کړي، نو بیا به د شکایت حق نه لري له همدې امله د خپرونو کیفیت بیخي خراب شوی ځکه دوی داسې خپرونې غواړي چې هغه اورېدونکي نه خوښوي مثال دوی داسې خپرونې هم پېشنهاد کړي چې په کې د یو طالب سرتیري ژوند په مستند ډول راخېستل شي او د خپرونې په ډول خپور شي.»
بلخوا په ننګرهار کې د طالبانو تر ولکې لاندې د باختر دولتي اژانس راپور ورکړی، چې په دغه ولایت کې د اطلاعاتو او فرهنګ ریاست له لوري د غږیزو رسنیو مسلکي ارزونه پیل شوې.
راپور کې راغلي، چې دغه ولایت کې ټولې غږیزې رسنۍ په مسلکي ډول ارزیابي کېږي، څو شته نیمګړتیاوې یې تشخیص او د اصلاح په برخه کې ورسره همکاري وشي.
په همدې حال کې د خبریالانو نړیوالو بنسټونو په افغانستان کې د خبریالانو او رسنیو له خراب وضعیت څخه اندېښنه ښودلې او ویلي یې دي چې د طالبانو په تېره درې کلنه واکمنۍ کې ګڼشمېر رسنۍ تړل شوي، خبریالان او د رسنیو کارکوونکو خپلې دندې له لاسه ورکړي دي.
