اطلاعات روز: په کندهار او هلمند کې د طالبانو پولیس او ځایي سرچینې خبر ورکوي، چې په دې ولایتونو کې د دوو ځوانانو جسدونه موندل شوي دي.
کندهار کې د طالبانو د امنیې قومندانۍ ویاند اسدالله جمشید وایي، چې نن (سې شنبه، ۴ د لیندۍ) د دغه ولایت د ډنډ ولسوالۍ اړوند «فیض اباد» سیمه کې د دوی پولیسو د یو کس جسد موندلی دی.
نوموړی زیاتوي، چې په لومړنیو څیړنو کې ثابته شوې چې یاد کس په پټه او خپه ډول وژل شوی دی.
د جمشید په وینا، چې د دغه کس جسد د کندهار میرویس سیمه ییز روغتون ته لېږدول شوی، خو تر اوسه یې د هویت په اړه معلومات نه دي ترلاسه شوي.
هغه ویلي، چې د دغه مرموزې وژنې په اړه یې څیړنې روانې کړي دي.
ورته مهال هلمند کې سرچینې وایي، چې تېره ورځ د دغه ولایت د کجکي ولسوالۍ اړوند سعادت کلي په یو خالي کور کې د یوه ۱۸ کلن ځوان جسد موندل شوی دی.
سرچینه زیاتوي، د دغه ځوان جسد تر وژل کیدو وروسته تر ډبرو لاندې شوی و او تر موندل کیدو وروسته د کجکي ولسوالۍ روغتیایي کلینیک ته انتقال شوی دی.
سرچینه وایي، چې د دې پېښې د لامل او انګیزې په اړه معلومات او د وژل شوي ځوان د هویت په اړه بشپړ جزیات نه دي په ډاګه شوي.
د یادونې وړ ده، چې په هېواد کې د طالبانو راتګ سره د پټو وژنو ګراف لوړ شوی او ځایي طالب مسوولین بیا هڅه کوي، چې داسې پیښې پټې پاتې او له جزیاتو یې خلک خبر نه شي.
