د طالبانو ویاند ذبیحالله مجاهد په کابل کې یوې خبري غونډې ته د وینا پر مهال په خصوصي پوهنتونونو کې د حقوقو او سیاسي علومو پوهنځیو د تړل کېدو موضوع په ضمني ډول تایید کړې ده.
مجاهد نن (یکشنبه، د وږي ۸مه) د حکومت د رسنیو په مرکز کې د خبریالانو د پوښتنو په ځواب کې وویل، هغه برخې چې خصوصي پوهنتونونه په کې «ناتوانه» وي، تړل کېږي.
نوموړي وویل، په دولتي پوهنتونونو کې د حقوقو او سیاسي علومو برخې «لا هم فعالې دي» او لا به پیاوړې شي.
هغه زیاته کړه: «البته کېدای شي هغه خصوصي پوهنتونونه چې په دې برخو کې کمزوري وي او یا کمزوری تدریس پکې کېږي، د تړلو طرحه یې هم شامله شي. دولتي پوهنتونونه په دې کې نه شاملېږي، بلکې برعکس، په دولتي پوهنتونونو کې لا ډېر پام کېږي.»
تېره اوونۍ په ټولنیزو رسنیو کې د طالبانو د لوړو زدهکړو وزارت د رهبرۍ د یوې غونډې د صورتجلسې تصویر خپور شو. په دغه سند کې لیکل شوي وو چې د غونډې ګډونوالو پرېکړه کړې، چې په خصوصي پوهنتونونو کې د حقوقو، سیاسي علومو او نړیوالو اړیکو پوهنځي وتړل شي او په دغو برخو کې خصوصي تدریس هم ودرول شي.
طالبانو په تېرو پنځو کلونو کې د هېواد له پوهنتونونو څخه ځینې نورې څانګې هم حذف کړې دي، چې د هنر او موسیقۍ برخې یې له ډلې دي.
