د پېښو د خطرونو د کمولو له نړیوالې ورځې سره هممهاله، طالبانو د طبیعي پېښو او اقلیمي بدلونونو له امله د اوښتونکو زیانونو د کمولو لپاره له نړیوالو مرستو څخه د عادلانه لاسرسي غوښتنه کړې ده.
د طالبانو د ریاستالوزرا اقتصادي مرستیال عبدالغني برادر نن (سېشنبه، د تلې ۲۱مه) په کابل کې یوې غونډې ته ویلي، چې تخنیکي او مالي نړیوالو مرستو ته لاسرسی د افغانستان حق دی.
هغه له نړیوالې ټولنې او نړیوالو بنسټونو غوښتي، چې د اقلیمي بدلونونو پر وړاندې مبارزه له «سیاسي ملاحظاتو» سره ونه تړي.
د طالبانو اقتصادي مرستیال ویلي، افغانستان د شنو خونو ګازونو په خپرېدو او د نړۍ د اقلیم په ویجاړولو کې هېڅ ونډه نه لري، خو د نړۍ د هېوادونو، په ځانګړي ډول د سترو صنعتي او تولیدي هېوادونو، د شنو خونو ګازونو د خپرېدو له امله په دوامداره توګه زیان ویني.
هغه ویلي: «دا د نړیوال اقلیمي عدالت له اصولو سره هېڅ سمون نه لري، چې موږ د ستونزې په رامنځته کولو کې ونډه ونه لرو، خو درنې او ستونزمنې پایلې یې وزغمو او د هغه ویجاړوونکي زیان بیه پرې کړو، چې نورو رامنځته کړی دی.»
عبدالغني برادر له نړیوالې ټولنې غوښتي، چې د عصري هواپېژندنې وسایلو، د پېښو له رامنځته کېدو مخکې د خبرداري سیسټمونو، پرمختللو ژغورنې تجهیزاتو او د تخنیکي ظرفیتونو د پیاوړتیا په برخه کې له افغانستان سره مرسته وکړي.
افغانستان د نړۍ له هغو لسو هېوادونو څخه دی، چې د اقلیمي بدلونونو له امله یې تر ټولو ډېر زیان لیدلی دی. دغه هېواد په تېرو پنځو کلونو کې له پرلهپسې سختې وچکالۍ سره مخ شوی او ورسره د اقلیمي بدلونونو له امله د سختو ورښتونو او ویجاړوونکو سیلابونو شاهد هم پاتې شوی دی.
