د طالبانو د بهرنیو چارو وزیر امیرخان متقي، د کوم ځانګړي هېواد له نوم اخیستو پرته، وايي چې اوس مهال د افغانستان په ګاونډ کې د نشهیي توکو پراخ کښت او قاچاق د دغې ډلې تر ټولو لویه اندېښنه او ستونزه ده.
متقي دغه څرګندونې نن (سهشنبه، د لړم ۵مه) د «افغانستان اسلامي امارت د نشهیي توکو پر وړاندې مبارزه؛ واقعیتونه او لاسته راوړنې» تر سرلیک لاندې په یوه غونډه کې کړې دي. په دې غونډه کې په کابل کې مېشتو بهرنیو سفیرانو او د نړیوالو سازمانونو استازو هم ګډون درلود.
د هغه په وینا، که نړیواله ټولنه د افغانستان په ګاونډیو هېوادونو کې د نشهیي توکو د تولید او قاچاق مخنیوي ته پاملرنه ونه کړي، د طالبانو مبارزه به نیمګړې پاتې شي.
متقي همداراز ویلي، که د نشهیي توکو پر وړاندې د طالبانو اقدامات په دقیقه توګه وارزول نه شي، د نشهیي توکو د کنټرول په اړه راپورونه په غیرمسلکي ډول چمتو شي، د سیمو واقعي ارزونه ونه شي او یا مغرضانه روایتونه خپاره شي، نو د دغې ډلې د مبارزې بهیر ته به لوی زیان ورسېږي.
هغه ویلي چې د طالبانو د مشر هبتالله اخوندزاده هغه فرمان چې د نشهیي توکو کښت، تولید او قاچاق یې منع کړي، د نشهیي توکو په اړه د دغې ډلې د پرېکنده دریځ څرګندونه کوي.
د طالبانو د بهرنیو چارو وزارت مالي او اداري مرستیال محمد نعیم هم په دې غونډه کې خبرې کړې دي. هغه د طالبانو د نشهیي توکو پر وړاندې د مبارزې د «لاسته راوړنو» د ساتلو لپاره د بزګرانو د بدیل معیشت برابرول، د روغتیايي مرکزونو ملاتړ، تخنیکي همکاري او سیمهییزه همغږي اړین بللي دي.
طالبان پر افغانستان له بیا واکمنېدو راهیسې ادعا کوي چې په هېواد کې یې د کوکنارو کښت صفر ته رسولی او د نشهیي توکو پر وړاندې یې پرېکنده مبارزه کړې ده.
خو د ملګرو ملتونو راپورونه ښيي چې د افغانستان په ځینو سیمو کې لا هم کوکنار کرل کېږي او د مصنوعي نشهیي توکو تولید هم زیات شوی دی.
