په افغانستان کې د ملګرو ملتونو د بشري مېشتېدنې پروګرام وايي چې کابل ښې ښاري پلان جوړونې او پانګونې ته اړتیا لري.
دې ادارې نن (سهشنبه، ۵ عقرب) په اېکس ټولنیزه شبکه کې د کابل ښار نقشې خپرې کړې دي، چې ښيي د افغانستان پلازمېنه په ۲۰۲۴ کال کې د ۲۰۰۴ کال په پرتله په پراخه کچه پراخه شوې ده.
د ملګرو ملتونو د بشري مېشتېدنې پروګرام د «ښارونو نړیوالې ورځې» په درشل کې په خپل پیغام کې ویلي چې کابل د مناسب ملاتړ په ترلاسه کولو سره کولای شي د میلیونونو وګړو لپاره په یوه پوینده او غوړېدونکي استوګنځي بدل شي.
تر دې مخکې هم دې ادارې د ګڼو راپورونو په خپرولو سره ویلي وو چې په افغانستان کې د جمهوري نظام د دوو لسیزو پر مهال ښاري کېدل زیات شوي او ښارونه له اړینو زېربناوو پرته، په بېنظمۍ سره پراخ شوي دي.
د ملګرو ملتونو د راپور له مخې، په ۲۰۲۴ میلادي کال کې د افغانستان د ښاري وګړو شمېر شاوخوا ۱۱.۴ میلیونو ته رسېدلی و. په تېرو دوو کلونو کې له پاکستان او ایران څخه د میلیونونو افغان کډوالو د جبري ایستلو له امله د ښاري وګړو شمېر لا هم زیات شوی دی.
ملګرو ملتونو په ۲۰۲۴ کال کې ویلي وو چې د افغانستان تر ۲۷ سلنې ډېر وګړي په ښارونو کې ژوند کوي. کابل او هرات، چې د ښاري وګړو تر ټولو ډېر شمېر لري، د چټک ښاري کېدو او اقلیمي بدلونونو له امله له فشار سره مخ دي.
مهاجرت، د کډوالو بېرته راستنېدل، په کلیو کې بېوزلي او بېکاري، او طبیعي پېښې لکه وچکالي او سېلابونه په افغانستان کې د ښاري کېدو د زیاتوالي له مهمو لاملونو څخه ګڼل کېږي.
