د طالبانو تر کنټرول لاندې رسنیو راپور ورکړی چې د دې ډلې د چاپېریال ساتنې ادارې پلاوی به د ملګرو ملتونو د اقلیمي بدلونونو په ۳۱مه غونډه (COP31) کې ګډون ونه کړي.
«رادیو حریت» نن (چهارشنبه، د لړم ۱۹مه) د طالبانو د چاپېریال ساتنې ادارې د چارواکو په حواله لیکلي چې ملګرو ملتونو د طالبانو پلاوي ته رسمي بلنلیک نه دی لېږلی او له همدې امله به د دې ډلې پلاوی د «کوپ ۳۱» په غونډه کې ګډون ونه کړي.
دغه رسنۍ لیکلي چې د ملګرو ملتونو د اقلیمي بدلونونو د ۳۱مې غونډې کوربه هېواد ترکیې له طالبانو غوښتي وو چې په دغه غونډه کې د مېلمنو په توګه ګډون وکړي.
د ملګرو ملتونو د اقلیمي بدلونونو ۳۱مه غونډه پرون د ترکیې په انتالیا ښار کې د نړۍ د بېلابېلو هېوادونو او نړیوالو سازمانونو د استازو په ګډون پیل شوه. دغه غونډه به د روانې میلادي میاشتې تر ۲۰مې نېټې دوام وکړي.
طالبانو د لومړي ځل لپاره په ۲۰۲۴ کال کې د ملګرو ملتونو د اقلیمي بدلونونو په ۲۹مه غونډه کې، چې د اذربایجان په پلازمېنه باکو کې جوړه شوې وه، د مېلمنو او څارونکو غړو په توګه ګډون کړی و؛ خو د ملګرو ملتونو د اقلیمي بدلونونو په ۳۰مه غونډه کې، چې په ۲۰۲۵ کال کې په برازیل کې جوړه شوې وه، بلنه نه وه ورکړل شوې.
افغانستان د اقلیمي بدلونونو پر وړاندې د نړۍ له زیانمنونکو هېوادونو څخه دی؛ خو پر افغانستان د طالبانو له بیا واکمنېدو وروسته، د دغه هېواد هېڅ استازی د ملګرو ملتونو د اقلیمي غونډو د ګډون لپاره نه دی بلل شوی.
ملګري ملتونه د طالبانو د حکومت د کورني او نړیوال مشروعیت د نشتوالي له امله د دغې ډلې استازي دغو غونډو ته نه رابولي.
