د طالبانو د بهرنیو چارو وزیر امیرخان متقي د افغانستان لپاره د روسیې له ځانګړي استازي ضمیر کابلوف سره لیدلي او د دوهاړخیزو اړیکو پر پراختیا، په ځانګړي ډول د سوداګرۍ د کچې پر لوړولو او په دې برخه کې د شته فرصتونو پر کارولو یې خبرې کړې دي.
د طالبانو د بهرنیو چارو وزارت نن (سېشنبه، د لړم ۱۹مه) پر اېکس د یوې اعلامیې په خپرولو سره د دې لیدنې خبر ورکړی دی.
دغه وزارت زیاته کړې چې امیرخان متقي له روسیې سره د طالبانو اړیکې مهمې بللې او ټینګار یې کړی چې دواړه لوري باید د متقابلو ګټو پر بنسټ له شته اقتصادي او سوداګریزو فرصتونو څخه ښه ګټه پورته کړي.
د طالبانو د بهرنیو چارو وزارت لیکلي چې د روسیې ځانګړي استازي په افغانستان کې د «وروستیو پرمختګونو» ستاینه کړې او د نشهيي توکو پر وړاندې یې د طالبانو مبارزه د پام وړ بللې ده.
د دغه وزارت د اعلامیې له مخې، د روسیې ځانګړي استازي همدارنګه د «ځینو نړیوالو سازمانونو راپورونه په دې اړه غیرواقعي» بللي دي.
د طالبانو د بهرنیو چارو وزیر هم ویلي چې طالبان د نشهيي توکو د کښت، تولید او قاچاق پر وړاندې پرلهپسې مبارزې ته ژمن دي او په دې برخه کې هڅې د افغانستان او ټولې سیمې لپاره مهمې دي.
د روسیې د بهرنیو چارو وزارت تر اوسه افغانستان ته د دغه هېواد د ځانګړي استازي د سفر او د طالبانو د بهرنیو چارو له وزیر سره د هغه د لیدنې په اړه څه نه دي ویلي.
روسیه اوس مهال د نړۍ یوازینی هېواد دی چې په افغانستان کې یې د طالبانو حکومت په رسمیت پېژندلی دی؛ خو د روسیې چارواکو څو ځله په افغانستان کې د ترهګرو ډلو د حضور او له دغه هېواده د نشهيي توکو د قاچاق په اړه اندېښنه څرګنده کړې ده.
