اطلاعات روز: د هلمند اوسیدونکي د جمعې په مېلو کې د غیرې قانوني درملو پلورلو اندیښنې راپورته کړي دي. دا درمل د دې ولایت په نادعلي او مارجې او ناوې ولسوالیو کې پلورل کېږي.
د هلمند په مرکز او ولسوالیو کې د هرې جمعې په ورځ په ميله ځایونو کې په خودسره ډول د هټیو مخې او پیاده لارو کې خلک درمل پلوري.
د نادعلي د ولسوالۍ اوسیدونکي د عامې روغتیا ریاست له مسولینو غوښتنه کوي څو د هغو کسانو مخه دي ونېسي چې په غیرې قانوني ډول درمل پلوري.
د دې ولسوالۍ یوه اوسیدونکي فرید اطلاعات روز ته وویل: «د خپل موټر ترڅنګ ناست وي درمل خلکو ته ورکوي هر ډول درمل چې غواړي ورسره شته زموږ غوښتنه داده چې د دغه درملو د خرڅ مخه دې ونیول شي ځکه دغه سره لمر ته دغه درمل پراته وي تاسې پوهیږئ چې لمر ته چې درمل کښېښودل شي په زهرو بدلیږي.»
په ورته وخت کې بیا د درملو یو پلورونکی چې هیڅ زده کړه نه لري وایې چې دوی خلکو ته د اسانتیاوو په هدف بیلابیلو درمل دغه سیمې ته ور وړي او له دې لارې عاید تر لاسه کوي.
هغه وایي: «څو ډوله درمل راسره شته هر ناروغ چې وي موږ درمل ورکوو مګر زده کړې مې نه دي کړي موږ دغه کار د خپل ځان لپاره د یوې ګولې ډوډۍ پیداکولو په هدف کوو بله ګټه دغه ده چې خلک په اسانۍ سره درملو ته لاس رسۍ پیداکوي.»
په لښکرګاه ښار کې یو متخصص ډاکټر محمد ولي همت وایي، دغه درمل چې په صحرایي میله ځایونو کې د خلکو لخوا پیرل کیږي، د ګټې پر ځای ناروغ ته په زیان بدلیږي.
همت وايي درمل باید په یوه ساړه ځای کې وساتل شي او وروسته د یوه مسلکي ډاکټر لخوا ناروغ ته ورکړل شي.
هغه وویل : «د هرې دوا وخت هم معلوم دی، کوم وخت چې دوا د معالج ډاکټر لخوا ناروغ ته ورکول کیږي نو د درملو ټول حالتونه په نظر کې نېول کیږي که چیري درمل ورکونکی شخص ډاکټر ونه اوسیږي هغه درمل بیا ددې پرځای چې ناروغ ته ګټه ورسوي بلکي د یو لړ نور جانبي زیان سره یې مخ کوي.»
د هلمند دعامې روغتیا ریاست مرسیتال دادمحمد محمدي وایي د میله ځایونو او د ولسوالیو لپاره یو ټیم ګمارلی دی او په خبره یې یاد ټیمونه به د خودسره درمل د پلور مخه نیسي.
هغه وویل: «د دې لپاره موږ پلان لرو په ټولو ولسوالیو کې پلټنه وکړو هغه درمل چې تر وخت تیر وي هغه به ټوليږي او هغه کسان چې اسناد نه لرې شخص مسلکي وي هغه ته به اسناد ورکول کیږې او هغه کسان چې غیري مسلکي وي د هغه سره به قانونې چلند کیږي.
په داسې حال کې د دې ولایت یو شمیر اوسیدونکې د غیر قانوني درملو له پلور څخه شکایت کوي، چې په دې ولایت په ګڼو ولسوالیو کې د اونۍ په بیلو بیلو ورځو کې مېلې جوړیږي چې ډیری خلک د کور د اړتیا وړ توکي په یادو میله ځایونو کې د هټیوالو څخه اخلي.