اطلاعات روز: د ترکيې هیواد يوه خیریه بنسټ «IHH» د ارزګان ولایت مرکز ترینکوټ کې ۴ سوه بې وزلو ته بیلابیل خوراکي توکي وویشل.
د ياد بنسټ مسول مجاهد ددغو مرستو د ویش پرمهال وويل چې دغه مرستې چې بیلابیل خوراکي توکي پکې شامل دي هغو کورنيو ته ورکول کېږي چې دتيرو جګړو پرمهال یې ځاني زیان لیدلی وي.
هغه وايي، په يادو بشرې مرستو کې اوړه ،غوړي،بوره وريجي لوبیا او يو شمير نور خوراکي توکي شامل دي.
مجاهد وویل:« موږ د افغانستا په بیلابیلو سیمو کې ۴ زره ټنه خوراکي توکي په اړمنو ویشلي، چې په دغه مرستو کې لوبیا، نخود، وريجي، بوره، مالګه او اوړه شامل دي چې دلته ارزګان کې مو څلور سوه کورنيو ته وویشل.»
ارزګان ولایت کې د طالبانو د شهیدانو او معلولینو چارو ریاست مسوول مولوي منظور د ترکیې هیواد له مرستو مننه وکړه او پر ټولو مرستندویه ادارو یې غږ وکړ چي د اړمنو لاسنیوی وکړي.
دی وایي:« د ترکیی هیواد د خلکو مننه کوم چې بې وزلو سره یې مرسته وکړه او له نورو مرستندویه ادرو څخه هیله کوم چې جګړو ځپلو سره مرستې وکړي.»
مرسته ترلاسه کوونکي خوشحاله دي چي د ترکي هیواد لخوا ورسره د خوراکي توکو مرستې شوي وایي، سخت بې وزله او ګڼو ستونزو سره مخ دي اوغوښتنه کوي چي باید نوري مرستي هم ورسره وشی.
دوی زیاتوي:« موږ د سهار ماښام ډوډۍ نه درلوده کور يې ودان چې زموږ سره يې مرستې وکړې موږ ډير زيات مجبوره یو هيڅ نه لرو غوښتنه کوو چې په راتلونکي کې هم زموږ سره مرستې وکړي.»
تردې وړاندي د هند او چین په ګډون یوشمېر نورو هیوادونو هم د ارزګان اړمنو کورنیو سره مرستې کړي. په دغه ولايت کې زرګونه جګړه ځپلي خلک شته چې دا مهال مرستو ته اړتیا لري.