امریکايي رسنیو راپور ورکړی چې د واشنګټن ایالت د سیاتل ښار په یوه مېله کې د ډزو له امله لږ تر لږه دوه کسان وژل شوي او پنځه نور ټپیان شوي دي.
د اسوشیټډ پرېس د راپور له مخې، دا پېښه تېر ماښام د ځايي وخت ماښام شاوخوا ۶:۰۰ بجې (یکشنبه، ۴ د زمري) د سیاتل ښار په مرکز کې رامنځته شوې ده.
د راپور له مخې، د سیاتل د اوروژنې ادارې ویاندې، ګریس نونز ویلي، چې په دې ډزو کې دوه کسان د پېښې په ځای کې وژل شوي دي.
هغې زیاته کړې چې پنځه نور ټپیان، چې په کې یو دوه کلن هلک، دوه ښځې (۳۹ او ۵۶ کلنې) او دوه سړي (۲۳ او ۴۰ کلن) شامل دي، روغتون ته لېږدول شوي دي.
پولیسو د پېښې له ځایه یو شکمن کس نیولی، خو لا هم ډاډه نه دي چې برید همدغه کس ترسره کړی دی.
د پېښې شاهدانو ویلي چې امنیتي ځواکونه د دوو نورو شکمنو کسانو په لټه کې هم دي.
تر اوسه د دې برید د انګېزې په اړه کره معلومات نه دي خپاره شوي.
دا ډزې په هغه سیمه کې شوې چې د سیمهییز خوراکي جشن کوربه وه.
دغه کلنی جشن چې په ۱۹۸۲ میلادي کال کې پیل شوی، هر کال د درېیو ورځو په اوږدو کې شاوخوا ۳۵۰ زره ګډونوال د بېلابېلو خوړو، څښاک او ټولنیزو مراسمو د نندارې لپاره راجلبوي.
