په نیویارک کې دوه کسان وروسته له هغه د پولیسو له خوا ونیول شول چې د اسرائیلو د لومړي وزیر بنیامین نتانیاهو د استوګنځي ته نږدې له یوه فاضلابي نل څخه را ووتل.
د نیویارک پولیسو ویلي، ۲۶ کلن کوین رودریګز او ۲۵ کلن ساموئل ریورون د چهارشنبې په سهار (د تلې لومړۍ نېټه) د منهټن په ۶۱مه کوڅه کې د فاضلاب له یوه سوري څخه راوتلي دي.
«نیویارک پوسټ» په یوه راپور کې لیکلي چې کوین او ساموئل د پنجشنبې په ماښام ونیول شول او د جمعې په ورځ یوې محلي محکمې ته حاضر کړل شول.
پر دواړو د «ملکیت ته د ناقانونه ننوتلو» او «دسیسې» تورونه لګېدلي دي.
د پولیسو څېړنې ښيي چې د چهارشنبې په سهار شاوخوا ۲:۳۰ بجې شپږ کسان د فاضلاب نل ته ننوتلي وو. کوین او ساموئل هغه دوه کسان دي چې شاوخوا ۴:۳۰ بجې د امنیتي کامرو له لارې د فاضلاب له نل څخه د راوتلو پر مهال ثبت شوي دي. د یوه بل کس د راوتلو صحنه هم ثبت شوې، خو هغه تر اوسه نه دی نیول شوی.
د «نیویارک پوسټ» په وینا، کوین او ساموئل د وینزویلا اصله دي. هغوی د «لووز ریجنسي نیویارک» هوټل ته نږدې له فاضلابي نل څخه راوتلي وو؛ دا هغه ځای دی چې ټاکل شوې وه د اسرائیلو لومړی وزیر په کې استوګنه وکړي.
دواړو په محکمه کې په هر ډول دسیسه کې لاس لرل رد کړي او ویلي یې دي چې دوی د سرو زرو او نورو قیمتي شیانو په لټه کې وو، چې د دوی په وینا له باران وروسته د ښار فاضلابي نلونو ته داخلېږي.
دواړه تورن کسان د ضمانت په بدل کې خوشې شوي او ټاکل شوې چې د نومبر په میاشت کې بیا محکمې ته حاضر شي.
