طالب جنګیالی: په یوه ورځ مې په پنجشېر کې ۱۴ کسان وژلي دي

د طالبانو یوه جنګیالي له یوه بهرني یوټیوبر سره په خبرو کې ویلي، چې په یوه ورځ یې په پنجشېر کې ۱۴ کسان وژلي دي.

بریتانوي یوټیوبر ویل بیلي په دې وروستیو کې افغانستان ته د خپل سفر یوه ویډیو خپره کړې ده.

هغه د دې ویډیو په یوه برخه کې له یوه طالب جنګیالي سره خبرې کړې او له نوموړي یې پوښتلي چې کله یو څوک وژني، څه احساس کوي؟

دغه طالب جنګیالي ویلي، کله چې هغه څوک وژني چې د ده په وینا «کافر» وي یا «شریعت نه مني»، هېڅ ډول احساس نه کوي او داسې کس لکه «چرګ» وژني؛ خو که څوک د دښمنۍ له امله ووژني، نو احساس یې توپیر لري.

ویل بیلي له نوموړي پوښتلي چې تر اوسه یې څو کسان وژلي دي. هغه ویلي، یوازې یوه پېښه یې په یاد ده او هغه په یوه ورځ په پنجشېر کې د ۱۴ کسانو وژل دي.

د ویل بیلي ژباړونکي وضاحت ورکړی چې دغه طالب په پنجشېر کې د «افغانستان د ملي مقاومت جبهې» غړي وژلي دي.

په ټولنیزو شبکو کې د دې ویډیو خپرېدو پراخ غبرګونونه راپارولي دي.

د ټولنیزو شبکو کاروونکو د طالبانو د دغه غړي څرګندونې د جنایت په اړه اعتراف بللی دی.

طالبانو په ۲۰۲۱ کال کې، هغه مهال چې د افغانستان ټول ولایتونه یې نیولي وو، په پنجشېر کې له وسله‌وال مقاومت سره مخ شول. د مقاومت ځواکونو څو ورځې د طالبانو پر وړاندې مقاومت وکړ، خو په پای کې طالبانو پنجشېر هم ونیو.

طالبان په پنجشېر کې د بشري حقونو په پراخو سرغړونو، له هغې ډلې د بندیانو په وژلو، تورن شوي دي.