د روغتیا نړیوال سازمان په ننګرهار ولایت کې د پولیو یا ماشومانو د ګوزڼ د یوې نوې مثبتې پېښې د ثبت خبر ورکړی او ویلي یې دي چې په روان کال کې په افغانستان کې د دې ناروغۍ د مثبتو پېښو شمېر ۳۶ ته رسېدلی دی.
د دغه سازمان د راپور له مخې، نوې پېښه د ننګرهار په سرهرود ولسوالۍ کې ثبت شوې ده.
دغه سازمان ویلي چې په همدې اوونۍ کې د هلمند ولایت په نهرالسراج ولسوالۍ کې د پولیو یوه مثبته چاپېریالي پېښه هم ثبت شوې ده. په دې سره په ۲۰۲۶ کال کې په افغانستان کې د پولیو د چاپېریالي مثبتو پېښو شمېر ۹۲ ته رسېدلی دی.
افغانستان اوس په نړۍ کې د پولیو د مثبتو پېښو تر ټولو لوړه شمېره لري. په دغه هېواد کې د دې ناروغۍ پېښې د تېر کال په پرتله زیاتې شوې دي. په ۲۰۲۵ زېږدیز کال کې په افغانستان کې د پولیو ۲۱ مثبتې پېښې ثبت شوې وې.
له افغانستان وروسته پاکستان په نړۍ کې د پولیو د مثبتو پېښو تر ټولو لوړه شمېره لري. د روغتیا نړیوال سازمان د راپور له مخې، په همدې اوونۍ کې په پاکستان کې هم د خیبر پښتونخوا ایالت په خیبر ولسوالۍ کې د پولیو یوه نوې مثبته پېښه ثبت شوې ده. په دغه هېواد کې د روان کال له پیل راهیسې د پولیو شپږ مثبتې پېښې ثبت شوې دي، په داسې حال کې چې تېر کال ۳۱ پېښې ثبت شوې وې.
افغانستان او پاکستان اوس د نړۍ یوازیني هېوادونه دي چې پولیو پکې لا هم له منځه نه ده وړل شوې. ناامني او د واکسین د تطبیق مخنیوی په دغو هېوادونو کې د پولیو پر وړاندې د مبارزې له مهمو خنډونو ګڼل کېږي.
په وروستیو کلونو کې د پاکستان له لوري د افغان کډوالو د پراخې اېستنې او د دواړو هېوادونو ترمنځ د خلکو د تګ راتګ له امله د پولیو د خپرېدو په اړه اندېښنې هم زیاتې شوې دي.
