د کونړ په نورګل ولسوالۍ کې د تېر کال زلزلهځپلو کورنیو ته ۲۲۶ استوګنیز کورونه جوړ او ګټې اخیستنې ته سپارل شوي دي.
د کونړ لپاره د طالبانو د ولایت مقام رسنیز دفتر په یوه خبرپاڼه کې ویلي، چې دغه کورونه د نورګل ولسوالۍ په ماماګل سیمه کې د یو میلیون امریکايي ډالرو په لګښت جوړ شوي او نن (سېشنبه، د تلې ۲۱مه) زلزلهځپلو کورنیو ته سپارل شوي دي.
د خبرپاڼې له مخې، د دغو کورونو جوړول د افغانستان د بشري خدمتونو صندوق په مالي ملاتړ او د ناروې کمېټې په تخنیکي همکارۍ ترسره شوي دي. پر هر کور ۲۳۷۲ امریکايي ډالره لګښت شوی او د کورونو د جوړولو لپاره یې معادل افغانۍ کورنیو ته ورکړل شوې وې.
د دغو کورونو د جوړېدو سربېره، لا هم د کونړ په نورګل او څوکۍ ولسوالیو کې سلګونه کورنۍ د سرپناه د نشتوالي له امله تر کېږدیو لاندې ژوند کوي.
د ۲۰۲۵ کال د اګست پر ۳۱مه، د شپې شاوخوا ۱۲ بجې یوې زورورې زلزلې د کونړ نورګل، څوکۍ او ځینې نورې سیمې ولړزولې. د ورکړل شویو شمېرو له مخې، په دې زلزله کې ۲۲۰۵ کسان مړه او ۳۶۴۰ نور ټپیان شوي وو، زرګونه استوګنیز کورونه ویجاړ شوي او پراخ مالي زیانونه اوښتي وو.
