د امریکا ولسمشر ډونالډ ټرمپ ویلي، له ایران سره د جګړې د پای ته رسولو بهیر چټک شوی دی.
نوموړي په ورته وخت کې ویلي چې ایران «له پوځي پلوه عملاً خپل کار پای ته رسولی دی»، خو د نویو بریدونو احتمال یې هم رد نه کړ.
ټرمپ په سپینه ماڼۍ کې د قطر له لومړي وزیر شیخ محمد بن عبدالرحمن آل ثاني سره ولیدل. قطر له ایران سره د جګړې په اړه د منځګړیتوب له مهمو هېوادونو څخه دی. دا له منځنیو ټاکنو کې د جمهوري غوښتونکو له سختې ماتې وروسته له یوه بهرني مشر سره د ټرمپ لومړنۍ لیدنه وه.
ټرمپ وروسته په خپله ټولنیزه شبکه «ټروت سوشیل» کې ولیکل چې دواړو مشرانو «ډېرې ښې خبرې اترې» کړې او د ایران د اسلامي جمهوریت په اړه یې پر ګڼو موضوعاتو بحث کړی دی.
د منځنیو ټاکنو په درشل کې داسې پراخ اټکلونه موجود وو چې ښايي امریکا ډېر ژر پر ایران خپل بریدونه بېرته پیل کړي.
خو ټرمپ، سره له دې چې د نورو بریدونو احتمال یې پرانیستی پرېښی، د جګړې د بیا پیل کېدو احتمال کم بللی دی. نوموړي د دوشنبې په ورځ په سپینه ماڼۍ کې یوې خبري غونډې ته هم پر همدې دریځ ټینګار وکړ.
ټرمپ خبریالانو ته وویل: «ایران له پوځي پلوه عملاً خپل کار پای ته رسولی دی. موږ یوازې اوسنی وضعیت ساتو؛ خو که اړ شو چې بیا اقدام وکړو، بشپړ چمتووالی او وسلې لرو او د اقدام توان مو شته.»
ټرمپ د دوشنبې په ورځ په ټروت سوشیل کې په یوه پیغام کې وویل، د دې حقیقت په پام کې نیولو سره چې د خلیج په سیمه کې د امریکا مهم متحدین د اوسني وضعیت د ساتلو غوښتونکي دي، د ده په باور د نورو بریدونو احتمال «ډېر کم» دی.
هغه زیاته کړه: «موږ د دې شخړې د پای ته رسولو په لاره کې مثبت پرمختګ وینو او ډاډ به ترلاسه کړو چې په هر وخت کې د امریکا ګټې خوندي وي.»
په ورته وخت کې، ایراني چارواکو د واشنګټن د پرلهپسې فشارونو پر وړاندې سخت دریځ خپل کړی دی.
د ایران د ملي امنیت شورا منشي محسن رضايي د دوشنبې په وروستیو کې په خپله ایکس پاڼه کې ولیکل چې امریکا «د یوه ناهیلي قمارباز په څېر لاس او پښې وهي» او واشنګټن ته یې وویل: «خپل لاسونه راټول کړئ او د خیالي مذاکراتو په اړه د جعلي خبرونو له خپرولو لاس واخلئ.»
تر دې وړاندې د ایران د پارلمان رییس او د دغه هېواد لوړپوړي مذاکره کوونکي محمدباقر قالیباف په ایکس پاڼه کې ادعا کړې وه چې اسرائیل امریکا د جګړې پر لور هڅوي.
هغه زیاته کړې وه: «تر هغه چې واشنګټن د اسرائیل لومړی تګلاره پرېنږدي، امریکا او متحدین به یې په مستقیم ډول د یوې تیارې دورې پر لور روان شي.»
د ایراني چارواکو په وینا، د دغه هېواد په خاوره کې بریدونه لا هم دوام لري؛ خو د امریکا پوځ تر اوسه په ښکاره توګه د دغو بریدونو مسؤلیت نه دی منلی.
د هرمزګان مرستیال والي په دولتي ټلوېزیون کې اعلان کړی چې د هرمز تنګي په سیمه کې د قشم ټاپو د یکشنبې او دوشنبې ترمنځ د شپې پر مهال تر برید لاندې راغلی دی.
ټرمپ منلې چې له ایران سره جګړې لږ تر لږه تر یوه حده د منځنیو ټاکنو پر مهال د جمهوري غوښتونکو په ماتې کې ونډه لرلې ده؛ په ځانګړي ډول ځکه چې دې جګړې د امریکا په اقتصاد کې د بیو د لوړېدو لامل شوې ده.
