د ایران د سپاه پاسداران سمندري ځواک اعلان کړی، چې «د هرمز تنګي په غیرمجاز مسیر کې دوه سرغړوونکي د تېلو ټانکرونه» د چاودنو له امله درېدلي او په داسې حال کې پرېښودل شوي چې اور پرې بل دی.
د ایرنا خبري اژانس د راپور له مخې، سپاه پاسداران نن (سېشنبه، د لړم ۱۹مه) ویلي، چې یو «سوپر ټانکر» له سمندري ماین سره د لګېدو له امله چاودنه کړې او دویم د تېلو ټانکر، چې د امریکا د پوځ د جنګي الوتکو تر ملاتړ لاندې و او غوښتل یې په پټه له غیرقانوني مسیر څخه تېر شي، «له پېښې سره مخ شوی او د سخت اورلګېدنې له امله پر خپل ځای درېدلی دی».
د ایران د سپاه پاسداران سمندري ځواک زیاته کړې، چې دغو ټانکرونو خپل ټول د تګ راتګ او پېژندنې سیسټمونه بند کړي وو او له چاودنې وروسته د هرمز تنګي په جنوبي ساحلونو کې په داسې حال کې پرېښودل شوي چې اور پرې بل دی.
د ایران سپاه پاسداران پر دغه هېواد د امریکا او اسرائیلو د بریدونو له پیل وروسته د هرمز تنګی وتاړه. سپاه وايي، چې بېړۍ او د تېلو ټانکرونه یوازې د ایران د سمندري ځواک په اجازه او د ټاکل شوې لارې له مخې کولای شي له هرمز تنګي څخه په خوندي ډول تېر شي.
ایران د هرمز تنګي ځینې برخې په سمندري ماینونو هم پوښلې دي. که څه هم امریکا وايي، چې دغه ماینونه یې پاک کړي، خو ایراني رسنۍ هره ورځ د هغو پېښو راپورونه خپروي، چې پکې د تېلو ټانکرونه له سمندري ماینونو سره لګېږي.
