افغانستاننینگ سابق جمهور رییسی حامد کرزی طالبلرگه آلدیندن خبر بېرگنیدن کېین اوییدن چیقیشینی، بو گروه کوچلری اېسه ضرور بۉلگن جایگچه اونی آلیب باریب، ینه اوییگه قَیتریشینی ایتدی.
او بو حقده « فایننشیال تایمز» نشریگه بېرگن صحبتیده معلوم قیلگن.
کرزی «اویدن تشقریگه چیقه آلهسیزمی؟» دېگن سوالگه: «اولرگه (طالبلرگه) خبر بېرگنیمدن کېین. اولر خوفسیزلیکنی تأمینلهیدی. مېنی ضرور بۉلگن جایگچه آلیب باریشهدی و ینه قَیتریب کېلیشهدی»، – دېب جواب بېرگن.
اونینگ ایتیشیچه، او حاضر چېکلاولر آستیده یشهماقده، بیراق طالبلر بیلن عمومي مناسبتلری حرمت دایرهسیده قالماقده.
«مېن چېکلاولر آستیدهمن، اما عمومي مناسبتلر جوده حرمتلی. اولر مېنینگ بیاناتلریمدن جوده، جوده غضبلنیشهدی. چېکلاولر هم شو نینگ اوچون… قۉنغیراق قیلیشهدی، آلدیمگه کېلیشهدی و ناراضیلیک بیلدیریشهدی»، دېگن کرزی.
سابق جمهور رییس نینگ قۉشیمچه قیلیشیچه، طالبان اوندن نېگه بو گروه حقیده ایجابي فکر بیلدیرمسلیگینی سۉرهیدی.
«مېن اولرگه ایتهمن: قیزلر مکتبگه باریشدن محروم اېتیلر اېکن، بوندهی گپنی مېندن هېچ قچان اېشیتمهیسیز. قیزلر ینه مکتبگه قَیتگنیده، سیز حقینگیزده ایجابي گپیرهمن؛ بوگون اېسه یۉق»، – دېگن او.
طالبلر عیاللر و قیزلرگه نسبتاً ۱۰۰دن آرتیق فرمان و چېکلاولر جاري قیلگن. نتیجهده افغانستان قیزلر تعلیم آلیشدن محروم اېتیلگن دنیادهگی یگانه دولتگه ایلنگن.
کرزینینگ اوچ قیزیدن ایکّی نفری هم طالبلر تعقیقی سبب مکتبگه باره آلمهیدی. کرزی قیزلری مکتبدن محروم قیلینگنی اوچون خفه اېکنینی ایتگن.
سابق جمهور رییس اجتماعي ترماقلردهگی خبرلری آرقهلی قیزلر تعلیم آلیشی ضرورلیگینی بیر نېچه بار تأکیدلهگن. اونینگ سیاسي فعالیتی اساسن شو کبی بیاناتلر بېریش و جمهوریت عالي تینچلیک کېنگشی رئیسی بۉلگن عبدالله عبدالله بیلن اوچرهشوولردن عبارت اېکنی ایتیلماقده.
کرزی و عبدالله افغانستانده قالگن سابق حکومت نینگ کم سانلی یوقاری مرتبهلی رهبرلریدن حسابلنهدی. بیراق هر ایکّی سیاستچی هم اوی قماغیده اېکنی ایتیلماقده.
کرزی هندستان اېلچیسینینگ افغانستاننی ترک اېتیش حقیدهگی پیشنهادینی رد اېتگنینی هم ایتگن.
«اونگه شوندهی دېدیم: حتا قولش یقینلشهیاتگن بۉلسه هم، مېن مملکتیمده قالهمن؛ بیز بو یېردن کېتمهیمیز»، دېگن کرزی.
