اروپا اتفاقی نینگ افغانستاندهگی نمایندهلیگی پاکستان نینگ کنر و پکتیکا ولایتلریگه اویوشتیرگن سۉنگگی هوا هجوملریگه مناسبت بیلدیرر اېکن، تینچ اهالینی حمایه قیلیشگه چقیردی.
اروپا اتفاقی نینگ افغانستاندهگی نمایندهلیگی بوگون (چهارشنبه، ۱ میزان) خده یازیشیچه، «تینچ اهالی حمایه قیلینیشی و خلقارا گومانیتار حقوققه رعایه اېتیلیشی کېرهک».
بیرلشگن ملتلر تشکیلاتی نینگ افغانستاندهگی یاردم ادارهسی (یوناما) پاکستان نینگ افغانستانگه اویوشتیرگن سۉنگگی هوا هجوملریده اوچ نفر تینچ فقرا هلاک بۉلگنینی تصدیقلهگن.
پاکستان قیرووچی اوچاقلری شو هفته نینگ دوشنبه کونی تانگده کنر ولایتی نینگ نورگل تومنیدهگی و پکتیکها نینگ برمل اولسواللیگی حدودلرنی بامباردمان قیلگن.
طالبان مطبوعات سوزلاوچیسی ذبیحالله مجاهد نینگ ایتیشیچه، پاکستان نینگ کنر ولایتی نورگل تومنیدهگی «پتان» حدودیگه اویوشتیرگن هجومیده بیر تورر جای نشانگه آلینگن. نتیجهده بیر کېکسه اېرکک، اونینگ رفیقهسی و قیزی هلاک بۉلگن، عایله نینگ ینه تۉرت اعضاسی یرهلنگن.
اونینگ ایتیشیچه، پاکستان نینگ پکتیکا نینگ برمل تومنیگه اویوشتیرگن هجوملریده بۉش اوی و بیر دوکان نشانگه آلینگن، بیراق قربانلر بۉلمهگن.
اما پاکستان حکومتی اوشبو اۉپراسیونده «۲۸ نفر ترورچی» اۉلدیریلگنینی معلوم قیلدی.
پاکستان نینگ تأکیدلشیچه، بو هجوملر خهیبېر-پهختونخوهدهگی سۉنگگی هجوملرگه جوابهن عملگه آشیریلگن.
