ایران ییتکرمه‌لری‌نینگ خبر بېریشیچه، ایران تشقی ایشلر وزیری عباس عراقچی قطر واسطه‌چیسی بیلن امریکا بیلن اوروشنی یکونلش و هرمز بۉغازینی قَیته آچیش مسأله‌سیده مذاکره آلیب باره‌دی.
«صدا و سیما» تلویزیونی خبریگه کۉره، بو اوچره‌شوو بوگون (دوشنبه، ۶ میزان) نیویورک شهریده بۉلیب اۉتیشی رېجه‌لشتیریلگن.
مذکور رسانه‌نینگ یازیشیچه، اوچره‌شووده «واسطه‌چیلر آرقه‌لی امریکاگه یوباریلگن و امریکادن آلینگن خبرلر بیلن باغلیق سۉنگگی اۉزگریشلر، خصوصاً، ایران نینگ هرمز بۉغازینی قَیته آچیش بۉییچه یېتّی شرطی» محاکمه قیلینیشی کوتیلماقده.
«صدا و سیما» ایران‌نینگ یېتّی شرطی اۉتگن هفته سه‌شنبه کونی قطر آرقه‌لی امریکاگه یېتکزیلگنینی یازگن.
مذکور ییتکرمه ایران هیئاتیگه یقین منبعگه ته‌یه‌نیب، «امریکا بیلن مذاکره آلیب باریش بۉییچه هېچ قنده‌ی رېجه هیئت کون ترتیبیده یۉق»، دېب خبر بېرگن.
بو اوچره‌شوو آمریکا جمهور رییسی دونالد ترامپ ایران‌نینگ هرمز بۉغازینی یېتّی کونلیک مدت ایچیده قَیته آچیش حقیده‌گی تکلیفینی رد اېتگن بیر پیتده بۉلیب اۉتماقده.
بیراق ترامپ ایکّی تامان اۉرته‌سیده‌گی مذاکره‌لر واسطه‌چیلر آرقه‌لی دوام اېتیشیدن امیدوار اېکنینی بیلدیرگن.
