طالبان گروهی‌نینگ مالیه وزیرلیگی دولت خدمتچیلری‌نینگ معاشلرینی تۉله‌ش کېچیکتیریله‌یاتگنی حقیده‌گی خبرنی رد اېتیب، بو خبرلر تۉغری اېمسلیگینی بیلدیردی.
اوشبو وزیرلیک بوگون (دوشنبه، ۴ عقرب) بیانات ترقه‌تیب، «معاشلرنی تۉله‌ش کېچیکتیریله‌یاتگنی حقیده‌گی میش-میشلر ناتۉغری»، دېب معلوم قیلدی.
طالبلرینگ مالیه وزیرلیگی «بو میش-میشلرنی رد اېتر اېکن، فقرالرگه دولت اداره‌لری‌نینگ خادملریگه معاشلر عادتده‌گی ترتیبده و هېچ قنده‌ی معماسیز اۉز وقتیده تۉله‌نیشیگه» ایشانتیردی.
بو بیانات دولت اداره‌لریده‌گی منبعلر دولت خدمتچیلری‌نینگ معاشلری «کېینگی بویروققه‌چه» توخته‌تیلگنینی ایته‌یاتگن بیر پیتده بېریلدی.
دولت نظارتیده‌گی اداره‌لردن بیری‌نینگ مالیه بۉلیمیده‌گی منبع کېچه «اطلاعات‌روز» گزیته‌سیگه بېرگن معلوماتیده طالبلر رسميلری کابلدن برچه ولایتلرده‌گی مستوفيتلرگه ملکی و حربي خدمتچیلر معاشلرینی حاضرچه تۉله‌مسلیک حقیده کۉرسه‌تمه بېرگنینی ایتدی.
طالبلرنینگ مالیه وزیرلیگیده‌گی ینه بیر منبع هم دولت خدمتچیلری نینگ معاشلرینی تۉله‌ش اوچون حجتلر جاري آی نینگ (عقرب) ۱۰-کونیگچه کېچیکتیریلگنینی تصدیقله‌دی.
اونینگ ایتیشیچه، بو حالت‌نینگ سببی حاضرچه نامعلوم و طالبلر رسميلری هم بو باره‌ده هېچ قنده‌ی ایضاح بېرمه‌گن.
طالبلر بوندن آلدین هم دولت خدمتچیلری‌نینگ معاشلرینی بیر نېچه بار کېچیکتیرگن. اَیریم حاللرده معاشلرنینگ کېچیکتیریلیشیگه اوشبو گروه‌نینگ بودجه مبلغلری تقچیللیگیگه دوچ کېلگنی سبب بۉلگن.
