سویس‌نینگ زوریخ شهریده تیناوون ۲۹-میزان، اۉزبېک تیلی ملي کونی مناسبتی بیلن فرهنگی تدبیر بۉلیب اۉتدی. اونده اۉزبېک ادبیاتشناسلری، تیلشناسلر، تدقیقاتچیلر، شاعرلر، یازووچیلر، مدنیت نماینده‌لری، عیاللر و یاشلر اشتراک اېتدی.
محفل‌ده پروفیسور و متخصصلر اۉزبېک تیلی و ادبیاتی‌نینگ ایلدیزلری، تاریخی همده شکللنیش جریانی حقیده معروضه‌لر قیلدیلر. شونینگدېک، اۉزبېک تیلی‌نینگ اۉزبېک خلقی مدني و ادبي میراثیده‌گی اۉرنی علیحده تأکیدلندی.
سۉزگه چیققنلر ۲۹ـ میزان سنه‌سینی اۉزبېک تیلی ملي کونی صفتیده نشانلش، اوشبو تیلنی ترغیب قیلیش و رواجلنتیریش، شونینگدېک، اۉزبېک تیلیده‌گی ادبي همده مدني اثرلرنی نشر اېتیشنی قۉللب-قوّتلش مهم‌لیگینی قید اېتدیلر.
تدبیر دوامیده بیر قطار شاعرلر اۉزبېک تیلی ملي کونیگه بغیشلنگن شعرلرینی اۉقیدیلر. شونینگدېک، اۉزبېک تیلیده یقینده نشر اېتیلگن بیر نېچته ینگی کتاب‌نینگ تقدیماتی بۉلیب اۉتدی.
مذکور دستور دایره‌سیده موسیقي چیقیشلر هم نمایش اېتیلدی. بوندن تشقری، اۉزبېک خلقی‌نینگ ملي طعاملری، عنعنوي کییملری و هنرمندچیلیک نمونه‌لری کۉرگزمه‌گه قۉییلدی.
تشکیلاتچیلر نینگ تأکیدلشیچه، تدبیردن کۉزلنگن مقصد اۉزبېک تیلی و ادبیاتینی اسره‌ب-اوه‌یلش، اۉزبېک خلقی‌نینگ مدني میراثینی کېنگ ترغیب قیلیش همده تیلنی رواجلنتیریش و عامه‌لشتیریش اوچون امکانیتلرنی کېنگه‌یتیریشدن عبارت.
