افغانستان‌نینگ بیرلشگن ملتلر تشکیلاتیدهگی دایمي نماینده‌لیگی سرپرستی نصیراحمد فایق بیرلشگن نینگ «اوچینچی کمیته‌سی» ییغیلیشیده یېر و ملکلر نینگ تارتیب آلینیشی همده هزاره‌لر نینگ مجبوري روشده کۉچیریلیشی چوقور تشویش اویغاته‌یاتگنینی ایتدی.
بیرلشگن ملتلر تشکیلاتی‌نینگ عمومی ییغیلیشی‌نینگ اوچینچی کمیته‌سی ییغیلیشی بوگون (پنج‌شنبه، ۷ عقرب) کابل وقتی بیلن تانگده نصیر احمد فایق همده بیرلشگن ملتلر تشکیلاتی‌نینگ انسان حقوقلری کېنگشی نینگ افغانستان بۉییچه مخصوص گزارشگری ریچارد بنت اشتراکیده بۉلیب اۉتدی.
نصیر احمد فایق اوشبو ییغیلیشده طالبان نظارتی آستیده‌گی افغانستانده اېتنیک و دیني آزچیلیکلر نینگ احوالی «زودلیک بیلن اعتبار قره‌تیشنی طلب قیلیشینی» تأکیدله‌دی.
او شونده‌ی دېدی: «هراتده بیر زیارتگاه یقینیده ۱۳ نفر شیعه مسلمانی‌نینگ اۉلدیریلگنی حقیده‌گی خبرلر، شیعه‌لر نینگ دیني و عایله‌وي مراسملریگه تأثیر کۉرسه‌ته‌یاتگن چېکلاولر، یېر و ملکلر نینگ تارتیب آلینیشی همده هزاره و شیعه جماعه‌لری نینگ مجبوري روشده کۉچیریلیشی چوقور تشویشلیدیر.»
فایق تأکیدلب، «افغانستان نینگ هېچ بیر فقراسی اېتنیک کېلیب چیقیشی، دینی یاکه اعتقادی سببلی تعقیب، کمسیتیش یاکه مجبوري کۉچیریلیشگه دوچ کېلمسلیگی کېره‌ک»، دېدی.
جناب فایق عیاللر، یاشلر، آزچیلیکلر، معلوللیگی بۉلگن شخصلر و افغانستان فقرالیک جمعیتی وکیللری اولر نینگ حیاتیگه بې‌واسطه تأثیر کۉرسه‌ته‌دیگن هر قنده‌ی قرار قبول قیلیش جریانیگه جلب اېتیلیشی کېره‌کلیگینی ایتدی.
او طالبلرنینگ افغانستانده‌گی حاکمیتنی اېگه‌للشی حقیده گپیرر اېکن، شونده‌ی دېدی: «حدود اوستیدن نظارت قانونيلیکنی انگله‌تمه‌یدی. قانونيلیک خلق‌نینگ اراده‌سیگه، اولر نینگ حقوقلرینی حرمت قیلیشگه و جوابگر باشقرووگه اساسلنگن اجتماعي کېلیشوودن کېلیب چیقه‌دی.»
افغانستان‌نینگ بیرلشگن ملتلر تشکیلاتیدهگی دایمي نماینده‌لیگی سرپرستی نصیر احمد فایق طالبان نینگ خلق بیلن مناسبتیده‌گی خطی-حرکتلرینی حسابگه آلمه‌سدن توریب، اوشبو گروه بیلن همکارلیک قیلیشنی «ظلمنی نارمه‌للشتیریش» دېب اته‌دی.
او شونده‌ی دېدی: «خلق‌ارا همکارلیک افغانستان خلقی نینگ حقوقلری و آرزو-امیدلریگه خدمت قیلیشی کېره‌ک و هېچ قچان ظلم، تضییق یاکه محروملیکنی عادتي حالگه ایلنتیرمسلیگی لازم.»
او بیرلشگن ملتلر تشکیلاتی‌نینگ اوچینچی کمیته‌سی ییغیلیشیده افغانستان خلقی همان عذاب چېکه‌یاتگنینی، طالبلر اېسه «کمسیتووچی قانونلر و محروم اېتیش» آرقه‌لی اۉز نظارتینی تاباره مستحکمله‌یاتگنینی ایتدی.
اونینگ تأکیدلشیچه، «طالبلر مخالف فکرلرنی باستیریش اوچون تاباره کۉپراق قۉرقوو و مجبورلش اصوللریدن فایده‌لنماقده».
فایق بیرلشگن ملتلر تشکیلاتی‌نینگ اوچینچی کمیته‌سی ییغیلیشیده مملکتنی اینکلیوزیو و جوابگر حکومت توزیشگه آلیب باره‌دیگن سیاسي جریاننی، شونینگدېک، افغانستان فقرالری اۉز مملکتی نینگ کېله‌جگینی شکللنتیریشده مضمونلی رۉل اۉینا‌شی اوچون ضرور شرایطلرنی یره‌تیشنی سۉره‌دی.
جناب فایق افغانستان نینگ سیاسي کېله‌جگیگه نسبتاً «ایزچیل خلق‌ارا یاندشوو» ضرورلیگینی تأکیدلب، بمتنی افغانستان خلقی باشچیلیگیده‌گی سیاسي جریاننی آسانلشتیریشگه چقیردی.
اونینگ قۉشیمچه قیلیشیچه، اوشبو سیاسي جریان افغانستاننی «همه شمول برچه‌نی قمره‌ب آلووچی و جوابگر حکومت» سری آلیب باریشی، اونده «افغانستان خلقی نینگ اراده‌سی و حقوقلری» کفالتلنیشی کېره‌ک.
فایق مملکتده‌گی انسان حقوقلری بیلن باغلیق وضعیتگه توخته‌لیب، ۳.۸میلیون قیز نینگ تعلیم آلیشدن محروم اېتیلگنی، تۉقّیز میلیون باله نینگ آغیر آچرچیلیکدن اذیت چېکه‌یاتگنی، ۳.۷ میلیون باله نینگ آغیر تۉییب طعاملنمسلیک معماسیگه دوچ کېله‌یاتگنی همده سۉنگگی اوچ ییلدن کمراق وقت ایچیده قۉشنی دولتلردن قریب بېش میلیون مهاجر نینگ قَیتیب کېلیشی بیلن باغلیق انقراضنی تیلگه آلدی.
اونینگ ایتیشیچه، افغانستان‌نینگ اوشبو معمالرینی مملکتده‌گی اساسي سیاسي انقراضگه برهم بېرمسدن توریب حل اېتیب بۉلمه‌یدی.
