بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری افغانستانده تریاک ایشلب چیقریش قَیته تیکلنگنی و اۉتگن ییلگه نسبتاً ۴۰۰ فایزگه آشگنینی معلوم قیلدی.
گیاهوند مادّه‌لر و جنایتچیلیک بۉییچه باشقرمه بوگون (پنج‌شنبه، ۷ عقرب) افغانستانده ۲۰۲۶-ییلده کۉکنار یېتیشتیریش و تریاک ایشلب چیقریش بۉییچه اۉتکزیلگن سۉراو نتیجه‌لرینی نشر قیلدی.
حساباتده ایتیلیشیچه، افغانستانده کۉکنار اېکیلگن یېرلر میدانی اۉتگن ییلگه نسبتاً ۳۳۰ فایزگه، تریاک ایشلب چیقریش حجمی اېسه ۴۰۰ فایزگه آشگن.
اوشبو تشکیلات‌نینگ سۉراو نتیجه‌لری شونی کۉرسه‌ته‌دیکی، جاري ییلده کۉکناری اېکیلگن یېرلر میدانی ۴۳ مینگ هکتاردن آشگن. حال‌بوکه، ۲۰۲۵-ییلده بو کۉرسه‌تکیچ قریب ۱۰مینگ هکتارنی تشکیل اېتگن. شونینگدېک، تریاک ایشلب چیقریش حجمی اۉتگن ییلگی قریب ۳۰۰ تُن‌دن ۱۵۰۰ تُن‌گه یقینلشگن.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری نینگ معلوم قیلیشیچه، کۉکناری یېتیشتیریش و تریاک ایشلب چیقریش حجمی ۲۰۲۲-ییلده گیاهوند مادّه‌لر تعقیقلنیشیدن آلدینگی درجه‌دن هنوز پست بۉلسه-ده، بو اۉسیش تعقیق جاري اېتیلگنیدن بېری قید اېتیلگن ایلک سېزیلرلی اۉسیش حسابلنه‌دی.
بو آره‌ده طالبلر کۉکناری یېتیشتیریشنی بوتونله‌ی یۉق قیلیش باره‌سیده‌گی سعی-حرکتلر جدّي دوام اېته‌یاتگنینی و ۲۲ مینگ هکتار یېر کۉکناری اېکینلریدن تازه‌لنگنینی دعوا قیلماقده.
شونگه قره‌مه‌ی، بیرلشگن ملتلر تشکیلاتی‌نینگ معلوماتلریگه کۉره، کۉپلب دهقانلر انیقلنیش و حقوقنی محافظه قیلووچی اۉرگانلر نینگ چاره‌لریدن قاچیش اوچون اېکین یېتیشتیریش اصوللرینی اۉزگرتیرگن.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه ادارهسی اَیریم دهقانلر کۉکناری اېکیلگن کیچیک یېر میدانلرینی غلّه دله‌لری آره‌سیده یاکه دېوار بیلن اۉره‌لگن حویلیلر ایچیده یه‌شیریشینی انیقله‌گن. باشقه‌لر اېسه انیقلنیش خوفینی کمه‌یتیریش اوچون اېکیش و حاصل ییغیش وقتینی اۉزگرتیرماقده.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری اجراچی مدیری مونیکا جوما شونده‌ی دېگن:
«کۉکناری یېتیشتیریش‌نینگ تۉرت برابر آشگنی دهقانلر اوچون مناسب مقابل تیریکچیلیک منبعلری موجود بۉلمه‌سه، بو اېکین میدانلرینی برقرار روشده قیسقه‌رتیریش قیینلیگینی کۉرسه‌ته‌دی».
او ینه شونده‌ی تأکیدله‌گن:
«طالبلر و خلق‌ارا همجعیت دهقان جماعه‌لرینی قۉللب-قوّتلش اوچون همکارلیک قیلیشی، تیریکچیلیک منبعلریگه، قیشلاق خۉجه‌لیگی اینفره‌توزیلمسیگه سرمایه کیریتیشی همده بازارلرگه چیقیش امکانیتینی یره‌تیش آرقه‌لی اولرگه یاردم بېریشی کېره‌ک».
بیرلشگن ملتلر تشکیلاتی معلوماتیگه کۉره، جاري ییلده کۉکناری یېتیشتیریش افغانستان نینگ ۳۴ ته ولایتیدن ۱۶ ته‌سیگه ترقه‌لگن. بو اۉتگن ییلگه نسبتاً بېشته ولایتگه کۉپدیر.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه ادارهسی گزاریشیگه کۉره، ۲۰۲۶-ییلده مملکتده کۉکناری اېکیلگن هر تۉرت هکتار یېر نینگ اوچته‌سی شِمالی-شرقي حدودلرگه تۉغری کېلگن. اوشبو تشکیلات حاضرده افغانستان‌نینگ شِمالی-شرقي قِسمی مملکتده‌گی کۉکناری یېتیشتیریش نینگ اساسي حدودیگه ایلنگنینی بیلدیرگن. حال‌بوکه، ۲۰۲۲ییلده تعقیق جاري اېتیلیشیدن آلدین کۉکناری اساسن مملکت نینگ جَنوبی-غربي حدودلریده یېتیشتیریلگن.
بیرلشگن ملتلر تشکیلاتی‌نینگ تدقیقاتلری شونی کۉرسه‌ته‌دیکی، تریاک نرخی بیرآز په‌سه‌یگن: ۲۰۲۵ییلده بیر کیلوگرام افیون ۵۷۰ دالردن ساتیلگن بۉلسه، ۲۰۲۶-ییلده بو نرخ ۵۰۰ دالرگه توشگن. شونگه قره‌مه‌ی، حاضرگی نرخ تعقیقدن آلدینگی درجه‌دن انچه یوقاری بۉلیب قالماقده. اۉشه دورده بیر کیلوگرام افیون ۱۰۰ دالردن هم ارزان بۉلگن.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری اجراچی مدیری نرکوتیک مادّه‌لر سوداسی بیلن شغللنووچی تره‌نسمیللي ترماقلر و اولر نینگ افغانستانده‌گی همده دنیا نینگ باشقه حدودلریده‌گی توزیلمه‌لرینی اۉرگنیش اوچون خلق‌ارا همکارلیک ضرورلیگینی تأکیدله‌گن.
اونینگ قۉشیمچه قیلیشیچه، «کۉکناری یېتیشتیریشنی برقرار روشده کمه‌یتیریش دهقانلرنی قۉللب-قوّتلشگه قره‌تیلگن ترقیات یاندشوولرینی نرکوتیک مادّه‌لر سوداگرلریگه قرشی قانوني چاره‌لر بیلن بیرگه‌لیکده عملگه آشیریشنی طلب قیله‌دی».
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه ادارهسی سۉراویده قید اېتیلیشیچه، سۉنگگی ییللرده کمه‌یگنیگه قره‌مه‌ی، منطقوي نرکوتیک مادّه‌لر سوداسی هنوز دوام اېتماقده.
اوشبو اداره معلوماتیگه کۉره، نرکوتیک مادّه‌لر تأمیناتیده‌گی اوزیلیشلر نینگ آلدینی آلیش اوچون سوداگرلر اوّلگی ییللردن قالگن تریاک ذخیره‌لریگه ته‌یه‌نگن بۉلیشی ممکن. بیراق ینگی معلوماتلر اوشبو ذخیره‌لر کمه‌ییب باره‌یاتگنینی کۉرسه‌تماقده.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه ادارهسی ۲۰۲۶-ییلگی جهان حساباتیده هم اروپاده گېراین تأمیناتی کمه‌ییشی نینگ دستلبکی بېلگیلریگه اشاره قیلگن.
اوشبو تشکیلات تأکیدلشیچه، طلب سه‌قلنیب قاله‌یاتگن و نرخلر یوقاری بۉلگن بیر شرایطده تأمینات‌نینگ کمه‌ییشی افغانستانده کۉکناری یېتیشتیریش و تریاک ایشلب چیقریشنی کۉپه‌یتیریش اوچون قۉشیمچه رغبت یره‌تیشی ممکن.
