منبعلرنینگ «اطلاعات‌روز» گزیته‌سیگه معلوم قیلیشیچه، طالبلر کابل شهری‌نینگ ۱۳-ناحیه‌سیگه قره‌شلی منطقه‌سیده ۲۵۰ته اوینی بۉشه‌تیش حقیده بویروق چیقرگن و اوشبو قرارگه قرشی چیققن محلي اهالی نینگ ۳۰ نفرینی حبسگه آلگن.
محلي منبع نینگ ایتیشیچه، طالبلر تخمیناً بیر هفته اوّل کابل شهری نینگ ۱۳-ناحیه‌سیده‌گی ۴۴ – و ۶۳-گذرلرده جایلشگن ۴۱ جېریب یېرنی «دولت ملکی» دېب اعلان قیلگن و اوشبو حدود اهالیسیگه اویلرینی بۉشه‌تیش حقیده بویروق بېرگن.
منبع نینگ معلوماتیگه کۉره، دشتی برشی منطقه‌سی‌نینگ جَنوبی-غربیده، «کتّه بلندي» تېپه‌لیگی آرتیده جایلشگن اوشبو حدودده قریب ۲۵۰ ته عایله استقامت قیله‌دی.
واقعه‌دن خبردار منبع نینگ قۉشیمچه قیلیشیچه، طالبلر ایکّی کون اوّل (سه‌شنبه، ۵عقرب) حدودگه کېلیب، اویلرنی بۉشه‌تیش اوچون ۱۵ کونلیک مدت بېلگیلنگن یازمه آگاهلنتیریشلرنی ترقه‌تگن.
منبع‌نینگ ایتیشیچه، حدود «دولت ملکی» دېب نشر قیلینیب، اویلرنی بۉشه‌تیش اوچون مدت بېلگیلنگنیدن سۉنگ، محلي اهالی بو قرارنی تنقید قیلگن همده اۉز یېرلریگه عاید حجتلر و ایشلرنی قَیته کۉریب چیقیشنی طلب قیلگن.
شو جریانده محله آقسقاللری بیلن طالبلر وکیللری اۉرته‌سیده ماجرا یوزه‌گه کېلگن و طالبان ۳۰ نفردن آرتیق کیشینی حبسگه آلگن.
اوّلراق اهالی‌نینگ کۉچمس ملکلری و یېرلرینی «دولت ملکی» دېب بېلگیلش حقیده‌گی قرارلرنی آچیق اعلان قیلیب کېلگن طالبان نینگ عدلیه وزیرلیگی حاضرگچه اوشبو حدود بۉییچه رسماً هېچ قنده‌ی بیانات بېرمه‌گن.
بو حالت طالبلر سۉنگگی اوچ ییل ایچیده مملکت‌نینگ تورلی شهرلریده‌گی ۵۰دن آرتیق تورر جای مسسیوینی تۉلیق یاکه قسماً «دولت ملکی» دېب اعلان قیلگن بیر پیتده یوز بېرماقده. بیراق اَیریم انیق حالتلرده، جمله‌دن، کابل و غزنیده هزاره‌لر استقامت قیله‌دیگن تورر جای مسسیولری بۉییچه اویلرنی بۉشه‌تیش حقیده بویروقلر چیقریلگن یاکه اوی اېگه‌لری و اهالی نینگ اۉزیدن اجاره حقی اوندیریلگن.
افغانستان‌نینگ بیرلشگن ملتلر تشکیلاتی‌نینگ حضوریده‌گی دایمي نماینده‌لیگی سرپرستی نصیر احمد فایق کېچه بیرلشگن ملتلر تشکیلاتی‌نینگ اوچینچی کمیته‌سیده انسان حقوقلری مسأله‌لریگه بغیشلنگن ییغیلیشده طالبان تامانیدن یېر و ملکلر نینگ تارتیب آلینیشی همده هزاره‌لرنینگ مجبوري کۉچیریلیشی چوقور تشویش اویغاته‌یاتگنینی بیلدیرگن.
