طالبلر ایچکی ایشلر وزیرلیگی‌نینگ گیاهوند مادّه‌لرگه قرشی کوره‌ش اداره‌سی یرلشگن ملتلر تشکیلاتی نینگ گیاهوند مادّه‌لر و جنایتچیلیک بۉییچه باشقه‌رمسی (UNODC) نینگ افغانستانده کۉکناری یېتیشتیریش و تریاک ایشلب چیقریش آشگنی حقیده‌گی ییللیک حساباتیده‌گی رقم و خلاصه‌لرنی رد اېتیب، اولرنی رسمي معلوماتلر همده دله دلیللریگه ضد دېب بهاله‌دی.
مذکور اداره حسابات مملکتده‌گی موجود وضعیتنی انیق عکس اېتتیرمه‌گنینی و گیاهوند مادّه‌لرگه قرشی کوره‌ش باره‌سیده‌گی عملي یوتوقلرنی اعتباردن چېتده قالدیرگنینی تأکیدله‌دی.
طالبلر ایچکی ایشلر وزیرلیگی صنعي یۉلداش تصویرلری، تخمیني حساب-کتابلر و منفعتدار تامانلرنینگ ناتۉغری معلوماتلریگه ته‌یه‌نیش، اولرنی دله معلوماتلری همده دله‌لرنی یۉق قیلیش بۉییچه حجتلر بیلن تققاسله‌مسدن توریب، قطعي خلاصه‌لر چیقریش اوچون یېترلی اېمسلیگینی بیلدیردی.
وزیرلیک‌نینگ قۉشیمچه قیلیشیچه، عملیاتلر باشلنیشیدن آلدین صنعي یۉلداش تصویرلریده بیرار دله موجود بۉلگنی، بو دله حاصل ییغیم-تېریمیگچه سقلنیب قالگنینی انگله‌تمه‌یدی. شو سببلی بونده‌ی دله‌لر ایشلب چیقریش حجمینی حسابلش اوچون اساس بۉلمسلیگی کېره‌ک.
بیرلشگن ملتلر تشکیلاتی‌نینگ معلوماتلریگه کۉره، جاري ییلده افغانستانده کۉکناری اېکیلگن یېرلر میدانی ۴۳ مینگ هکتاردن آشگن. ۲۰۲۵-ییلده اېسه بو کۉرسنکیچ قریب ۱۰مینگ هکتارنی تشکیل اېتگن.
شونینگدېک، تریاک ایشلب چیقریش حجمی اۉتگن ییلده‌گی قریب ۳۰۰ تُن‌دن ۱ مینگ ۵۰۰ تُن‌گه یقینلشگن.
بیراق طالبلر ایچکی ایشلر وزیرلیگی دله معلوماتلریگه کۉره، جاري ییلده انیقلنگن کۉکناری اېکینلری میدانی قریب ۲۶مینگ هکتارنی تشکیل اېتگنینی بیلدیردی. وزیرلیک نینگ ایتیشیچه، حاصل ییغیش باسقیچیگه یېتیب باریشیدن آلدین بو اېکینلرنی یۉق قیلیش بۉییچه عمایاتلر اۉتکزیلگن و اونینگ نتیجه‌سیده قالگن اېکینلر مقداری دېیرلی نالگه توشیریلگن.
وزیرلیک بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری یکوني حساب-کتابلریده معلومات منبعلری، صنعي یۉلداش تصویرلری‌نینگ سنه‌لری، دله‌لرنینگ جیغرافیه کوردیناتلری، اېکین میدانلری و ایشلب چیقریش حجمینی حسابلش اصوللرینی حسابگه آلیشی کېره‌کلیگینی تأکیدله‌دی.
طالبلر ایچکی ایشلر وزیرلیگی‌نینگ گیاهوند مادّه‌لرگه قرشی کوره‌ش دفتری خلق‌ارا تشکیلات‌نینگ خلق‌ارا موقعی ایشانچلی دلیللر و علمي اسلوب نینگ اۉرنینی باسه آلمه‌سلیگینی بیلدیردی.
مذکور اداره خلق‌ارا اېکسپېرتلر حساباتلری هر قنده‌ی سیاسي ملاحظه‌لر تأثیریدن خالی بۉلیشی و دله واقعلیگینی خالص همده عدالتلی طرزده عکس اېتتیریشی کېره‌کلیگینی ایتدی.
طالبلر بیرلشگن ملتلر تشکیلاتی‌دن حساب-کتابلرنینگ اساسلری و رقملر اۉرته‌سیده‌گی تفاوت سببلرینی حجتلر اساسیده انیق توشونتیریش، حساباتنی قَیته کۉریب چیقیش همده یۉق قیلینگن دله‌لر حقیده‌گی معلوماتلر و دله شرایطلرینی حسابگه آلگن حالده اونی توزه‌تیشنی سۉردی.
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری بوگون (پنج‌شنبه، ۷عقرب) افغانستانده ۲۰۲۶ییلده کۉکناری یېتیشتیریش و تریاک ایشلب چیقریش بۉییچه اۉتکزیلگن تدقیقات نتیجه‌لرینی اعلان قیلدی.
گزارش‌ده ایتیلیشیچه: «افغانستانده کۉکناری اېکیلگن یېرلر میدانی اۉتگن ییلگه نسبتاً ۳۳۰فایزگه، افیون ایشلب چیقریش حجمی اېسه ۴۰۰ فایزگه آشگن.»
بیرلشگن ملتلر تشکیلاتی‌نینگ گیاهوند مادّه‌لر و جنایتچیلیک بۉییچه دفتری کۉکناری یېتیشتیریش و تریاک ایشلب چیقریش حجمی ۲۰۲۲-ییلده گیاهوند مادّه‌لرنی تعقیقلش جاري اېتیلیشیدن آلدینگی درجه‌دن حلی هم پست اېکنینی، بیراق مذکور اۉسیش تعقیق جاري اېتیلگنیدن بېری قید اېتیلگن ایلک سېزیلرلی اۉسیش اېکنینی بیلدیردی.
بمت معلوماتلریگه کۉره، کۉپلب دهقانلر انیقلنیش و حقوقنی محافظه قیلووچی اۉرگانلر چاره‌لریدن قاچیش اوچون اېکین یېتیشتیریش اصوللرینی اۉزگرتیرگن.
بمت نینگ گیاهوند مادّه‌لر و جنایتچیلیک بۉییچه باشقه‌رمسی اَیریم دهقانلر کۉکناری اېکیلگن کیچیک یېر میدانلرینی غلّه دله‌لری آره‌سیده یاکه دېوار بیلن اۉره‌لگن حدودلرده یه‌شیره‌یاتگنینی انیقله‌گن. باشقه‌لر اېسه انیقلنیش خوفینی کمه‌یتیریش اوچون اېکیش و حاصلنی ییغیب آلیش وقتینی اۉزگرتیرماقده.
بمت نینگ گیاهوند مادّه‌لر و جنایتچیلیک بۉییچه باشقه‌رمسی اجراچی دیرېکتوری مانیکه جمعه شونده‌ی دېدی: «کۉکناری یېتیشتیریش نینگ تۉرت برابر آشگنی دهقانلر اوچون مناسب مقابل امکانیتلر موجود بۉلمه‌سه، اونی برقرار روشده کمه‌یتیریش قیین اېکنینی کۉرسه‌تماقده.»
