تورکيه ییتکرمه‌لری‌نینگ خبر بېریشیچه، بو مملکت ملي استخبارات تشکیلاتی (ام‌آی‌تی) «اسلامي دولت» (داعش) ترور گروهی‌نینگ خراسان ترماغی اعضاسینی افغانستان و پاکستان چېگره‌سیده‌گی حدودلردن قۉلگه آلیب، تورکيه‌گه آلیب کېلگن.
«اکشام گزیته‌سی» بوگون (جمعه، ۸ عقرب) اعلان قیلگن خبریده داعش اعضاسینی «اوغور بهادر» و «عبدالله» لقبی بیلن تنیشتیرگن.
گزېته یازیشیچه، اوغوز بهادر ۲۰۲۴-ییلده تورکيه‌دن افغانستان و پاکستان چېگره‌سیده‌گی حدودلرگه باریب، داعش صفیگه قۉشیلگن.
گزیته خبریگه کۉره، او افغانستان و پاکستان چېگره‌سیده‌گی داعش نینگ تورلی کمپلریده تورلی وظیفه‌لرنی بجرگن.
تورکيه ملي استخبارات تشکیلاتی اونینگ کۉرستمسیده «اۉزگور التون» اسملی، «ابو یاسیر التورکي» نامی بیلن تنیلگن شخص بیلن علاقه‌ده بۉلگنینی و عیناً او آرقه‌لی مذکور حدودلرگه آلیب باریلگنینی ایتگنینی بیلدیرگن.
«اکشام گزیته‌سی»نینگ یازیشیچه، اۉزگور التون ۲۰۲۵-ییلده قۉلگه آلینگن و داعش اعضالرینی تورکيه‌دن افغانستان و پاکستان چېگره‌سیده‌گی حدودلرگه آلیب اۉتیشده فعال رۉل اۉینه‌گن.
مذکور ییتکرمه ینه اونینگ داعش نینگ مېدیا بۉلیمیده فعالیت یوریتگن و ۲۰۲۶-ییل باشلریده قۉلگه آلینگن «احمد کازانچی» «ابو عبیده/ ابو ابراهیم» ناملری بیلن تنیلگن شخص بیلن همکارلیک قیلگنی و بیرگه‌لیکده فعالیت یوریتگنینی یازگن.
تورکيه‌‌نینگ اوشبو گزیته‌سی اۉز خبریده داعش اعضاسی نینگ انیق قچان قۉلگه آلینگنی و تورکيه‌گه آلیب کېلینگنینی معلوم قیلمه‌گن.
افغانستانده‌گی طالبلر رسميلری و پاکستان حکومتی حاضرچه بو باره‌ده ایضاح بېرمه‌گن.
طالبلر افغانستانده بیر نېچه بار داعش اعضالری بو گروه تامانیدن باستیریلگنیدن سۉنگ پاکستان نینگ چېگره حدودلریگه اۉتیب کېتگنی همده او یېرده یشیرین جایلر و مشغولات کمپلریگه اېگه اېکنینی دعوا قیلگن.
