سوريه تشقی ایشلر وزیری اسعد شَیباني بو مملکت‌نینگ «مکه پیمانی»گه قۉشیلیشی بۉییچه مذاکره‌لر آلیب باریله‌یاتگنینی ایتدی.
سوريه دولت اخبارات آژانسی سانا خبریگه کۉره، شَیباني بوگون (شنبه، ۹عقرب) بحرینده بۉلیب اۉته‌یاتگن «منامه ملاقاتی» انجمنیده: «دَمشق منطقه خوفسیزلیگی‌نینگ مهم قِسمیدیر و اونینگ برقرارلیگینی حمایه قیله‌دیگن هر قنده‌ی تیزیمنی قۉللب-قوّتله‌یدی»، دېگن.
او، شونینگدېک، «منطقه‌گه عمومي تيیب توریش و مدافعه تیزیملرینی رواجلنتیریش جوده ضرور»، دېیه تأکیدله‌گن.
«مکه پیمانی» تورکيه، سعوديه عربستانی و پاکستان اۉرته‌سیده امضالنگن مدافعه کېلیشوویدیر.
مذکور پیمان شرطلریگه کۉره، اوشبو اوچ دولتدن بیریگه قرشی هر قنده‌ی دولت یاکه گروه تامانیدن اویوشتیریلگن قوراللی هجوم اولر نینگ برچه‌سیگه قرشی قیلینگن هجوم دېب حسابلنه‌دی. اعضا دولتلر اېسه بونگه جواب بېریش یاکه بیرگه‌لیکده مدافعه چاره‌لرینی کۉریش مجبوريتینی آلگن.
سوريه بشار اسد حکومتی اغدریلیب، «شامنی آزاد قیلیش هیئتی» گروهی رهبری احمد شرع باشچیلیگیده مؤقت حکومت توزیلگنیدن سۉنگ سعوديه عربستانی و تورکيه بیلن یقین علاقه‌ده بۉلیب کېلماقده.
«شامنی آزاد قیلیش هیئتی» سوريه‌ده حاکمیتنی قۉلگه کیریتگنیدن سۉنگ احمدشرع خارجگه ایلک سفرینی سعوديه عربستانیگه عملگه آشیردی. شوندن کېین او تورکيه‌گه باردی.
