پاکستان اوردوسی بلوچستان ایالتیده‌گی نظارت-اۉتکزیش پسته‌سیگه اویوشتیریلگن درون هجومینی قَیترگنینی و بېشته دروننی نشانگه یېتیب باریشیدن آلدین یۉق قیلگنینی معلوم قیلدی.
پاکستان اوردوسی بیاناتیگه کۉره، اوشبو درون هجومی کېچه (پنج‌شنبه، ۷عقرب) «هندستان فتنه‌سی» گروهی تامانیدن اویوشتیریلگن. پاکستان‌ده بو اتَمه «بلوچستان آزادلیک حرکتی»گه نسبتاً قۉللنه‌دی.
پاکستان اوردوسی عصیانچیلر اوشبو پست بلندلیکده اوچه‌دیگن درونلر آرقه‌لی بلوچستان ایالتی‌نینگ خران اولسواللگیده‌گی «آلبات» منطقه‌سیده جایلشگن نظارت-اۉتکزیش پونکتینی نشانگه آلیشگه اورینگنینی بیلدیرگن.
افغانستان بیلن چېگره‌داش پاکستان نینگ بلوچستان ایالتی خیبر-پختونخوادن کېین مملکتده‌گی خوفسیزلیک جهتیدن اېنگ بې‌قرار ایکّینچی ایالت حسابلنه‌دی.
«بلوچستان آزادلیک حرکتی» اوشبو ایالتده بیر نېچه بار قانلی هجوملر اویوشتیرگن. اَیریم حاللرده اولر پاکستان خوفسیزلیک کوچلری خادملرینی گروگه هم آلگن.
پاکستان اوشبو گروه «پاکستان طالبان حرکتی» (تی‌تی‌پی) و باشقه ترورچی گروهلر قطاری اۉز هجوملرینی عملگه آشیریش اوچون افغانستان توپراغیدن فایده‌لنه‌یاتگنینی دعوا قیله‌دی. بیراق افغانستانده‌گی طالبلر بو دعوانی رد اېته‌دی.
طالبلر رسميلری هېچ بیر گروهگه افغانستان توپراغیدن باشقه دولتلرگه قرشی فایده‌لنیشگه رخصت بېرمسلیکلرینی ایتیب کېله‌دی.
