بیرلشگن ملتلر تشکیلاتی‌نینگ قاچقینلر ایشلری بۉییچه عالي کمیسارلیگی جاري ییلده افغانستانده ۴.۲ میلیون کیشی باش‌پناه بیلن تأمینلش باره‌سیده یاردمگه محتاج اېکنینی معلوم قیلدی. اولرنینگ قریب اوچدن بیر قِسمی قیش موسمی اوچون یېترلی ایسّیق کییم-کېچککه اېگه اېمسلیگینی بیلدیرگن.
اوشبو تشکیلات بوگون (جمعه، ۸ عقرب) اوکراین، سوريه، لبنان و افغانستانده‌گی تۉقّیز میلیون کیشیگه قیشکی یاردم کۉرسه‌تیش مقصدیده کمیده ۵۰ میلیون دالر مبلغ ییغیش کمپنیسینی باشله‌دی.
بیرلشگن ملتلر تشکیلاتی‌نینگ قاچقینلر ایشلری بۉییچه عالي کمیسارلیگی‌نینگ بیاناتیده ایتیلیشیچه، افغانستان کېنگ کۉلملی مهاجرلر قَیتیشی، اولکن گومانیتار احتیاجلر و مالیه‌لشتیریشده‌گی جدّي چېکلاولر شرایطیده ینه بیر آغیر قیش موسمینی قرشی آلماقده.
تشکیلات معلوماتیگه کۉره، ۲۰۲۵ـ ییل جنورییدن ۲۰۲۶ـ ییل جنورییگچه پاکستان و ایراندن قریب تۉرت میلیون کیشی افغانستانگه قَیتگن. اولرنینگ اکثریتی حیاتینی قَیته تیکلش اوچون جوده کم مبلغ و امکانیتلرگه اېگه.
بیرلشگن ملتلر تشکیلاتی‌نینگ قاچقینلر ایشلری بۉییچه عالي کمیسارلیگی بیاناتیده تأکیدلنیشیچه، مبلغ یېتیشمسلیگی موجود یاردم دستورلری‌نینگ چېکلنیشیگه، جمله‌دن، قَیتیب کېلگنلرگه نقد پول، باش‌پناه‌لرنی ترمیملش اوچون تۉپلملر، کۉرپه-تۉشک و ایسیتیش واسطه‌لرینی تقدیم اېتیشگه سلبي تأثیر کۉرسه‌تگن.
بیرلشگن ملتلر تشکیلاتی‌نینگ قاچقینلر ایشلری بۉییچه عالي کمیسارلیگی‌نینگ تشقی علاقه‌لر بۉییچه مدیری دومینیک هایدنینگ ایتیشیچه، افغانستانده‌گی عایله‌لر ایسّیقلیک، آزیق-طعام و طبي خدمتلر اۉرته‌سیده قیین تنلاو قیلیشگه مجبور بۉلماقده.
اونینگ قۉشیمچه قیلیشیچه، اۉتگن قیش موسمیده کۉپلب عایله‌لر ایسّیق قالیش اوچون کارتون، کاغذ و پلاستیک چیقیندیلرنی یاقیشگه مجبور بۉلگن، چونکه اولر نینگ کۉمیر یاکه اۉتین ساتیب آلیشگه قُربی یېتمه‌گن.
بیرلشگن ملتلر تشکیلاتی رسميسی‌نینگ تأکیدلشیچه، باله‌لر بونده‌ی وضعیتده اینیقسه حمایه‌سیز قتلم حسابلنه‌دی. تشکیلات اۉتگن قیشده‌گی آغیر وضعیت تکرارلنیشی یاکه ینه‌ده کوچه‌ییشیدن خواطرده. چونکه اۉتگن ییلی باله‌لر آره‌سیده پنېومونیه و نفس یۉللری کسللیکلری بیلن باغلیق کۉپلب حالتلر کوزه‌تیلگن.
طالبان افغانستانده حاکمیتنی قَیته اېگه‌لله‌گنیدن سۉنگ، مملکت کېنگ کۉلملی انسان پرورلیک بحرانگه یوز توتدی و میلیونلب فقرالرنینگ حیاتی انسانپرورلیک یاردملریگه باغلیق بۉلیب قالدی.
بیرلشگن ملتلر تشکیلاتی‌نینگ معلوماتلریگه کۉره، جاري ییلده افغانستانده ۲۱.۹میلیون کیشی انسان پرورلیک یاردمگه محتاج. یاردم تشکیلاتلری اېسه اېنگ ضعیف قتلمگه منسوب ۱۷.۵ میلیون کیشیگه کمک بېریشنی اوستوار وظیفه صفتیده بېلگیله‌گن.
قیش موسمیده احتیاجمند عایله‌لر و مملکتگه قَیتیب کېلگن مهاجرلر نینگ احوالی اینیقسه آغیرلشه‌دی. چونکه اولرنینگ اکثریتی باش‌پناه‌گه، شونینگدېک، اۉتین، کۉمیر و ایسیتیش واسطه‌لرینی ساتیب آلیش اوچون یېترلی مبلغگه اېگه اېمس.
