«افغان ایواک» امریکا حکومتی افغان مهاجرلرینی اوچاقگه اۉتقزیب، طالبلر قۉلیگه تاپشیریش عرفه‌سیده تورگنینی اَیتماقده.
«افغان ایواک» باشلیغی شان وندایور بوگون (جمعه، ۸عقرب) بیانات بېریب، امریکا حکومتی بو ایشنی آره‌لیق سیلاولر بیلن بیر وقتده عملگه آشیرماقچی اېکنینی، تاکه بونگه هېچ کیم اعتبار بېرمسین، دېگن امیدده اېکنینی معلوم قیلگن.
او شونده‌ی دېگن: «بیر انساننی [افغانستانگه] یوباریش شونچه‌که مملکتدن چیقریب یوباریش اېمس؛ بلکه اونی اۉلیم بیلن یکونلنیشی ممکن بۉلگن تقدیرگه حکم قیلیشدیر.»
شان وندایور شونینگدېک، حاضر دېپورت خوفی آستیده تورگن کۉپلب افغانلر کابل قوله‌گنیدن کېین افغانستاندن قاچیب کېتگنینی ایتگن. اونینگ سۉزلریگه کۉره، اولرنینگ اَیریملری اقش کوچلری بیلن بیرگه خدمت قیلگن اېرککلر نینگ اکه-اوکه‌لری یاکه اۉغیللریدیر.
اونینگ تأکیدلشیچه، بو آدملر امریکاگه قَیسی یۉل آرقه‌لی کېلگنیدن قطع نظر، اولرنی کوته‌یاتگن خوف بیر خیل و «بو حکومت بو ایشنی قارانغیلیکده، جماعتچیلیک نینگ کۉزیدن ییراقده عملگه آشیرماقده».
«افغان ایواک» باشلیغی شونده‌ی دېگن: «مهاجرت بۉییچه عادتي و دَوري تېکشیروولردن اۉتیش اوچون اختیاري روشده کېلگن اېرککلر حبسگه آلینماقده، اولر نینگ تېلفونلری ایشله‌مه‌ی قالماقده، حسابلری بلاکلنماقده و اولر یریم تونده باشقه جایلرگه کۉچیریلماقده.»
اونینگ ایتیشیچه، بو شخصلرنینگ وکیل مدافع لری حکومت محکمه‌گه تقدیم اېته‌یاتگن حجتلر و ایش ماتریاللری آرقه‌لی اۉز مزاجلری نینگ قه‌یېرگه آلیب کېتیلیشی رېجه‌لشتیریلگنینی بیلیب آلیشماقده.
شان وندایورنینگ ایتیشیچه، امریکا حکومتی بو پروازلر قه‌یېرگه قۉنیشینی اعلان قیلیشدن باش تارتماقده، چونکه بو آدملر منزلگه یېتیب بارگچ، اولرنی قنده‌ی تقدیر کوته‌یاتگنینی بیله‌دی.
او بو ایش نینگ آلدینی آلیش یۉلی صفتیده اقش کانگرسیده «افغانستان اوچون وقتینچه‌لیک حمایه تۉغریسیده»گی قانوننی قبول قیلیشنی کۉرسه‌تیب، وکیللرگه: «اوچاق پرواز قیلیشیدن آلدین بو انسانلرنی حمایه قیلیش اوچون چاره کۉره‌سیزمی؟» دېگن سوال بیلن مراجعت قیلگن.
«افغان ایواک» باشلیغی امریکا حکومتی نینگ بو قراری و او قنچه افغان مهاجریگه تأثیر قیلیشی ممکنلیگی حقیده باتفصیل معلومات بېرمه‌گن.
امریکاده افغانستانلیک بیر فقرا نینگ واشنگتن شهریده ملي گارد اعضالریگه هجوم قیلگنیدن کېین افغان مهاجرلریگه نسبتاً باسیم کوچه‌یگن.
سۉنگگی کونلرده امریکا باجخانه و فقرالیک خدمتی (مهاجرت) خادملری تامانیدن اَیریم افغان مهاجرلری نینگ حبسگه آلینگنی حقیده هم خبرلر ترقه‌لدی.
