کاناداده اۉزبېک تیلی ملی کونی مناسبتی بیلن تورلی مملکتلردن کېلگن تورکي خلقلرنینگ مدني و اجتماعي وکیللری اشتراکیده طنطنه‌لی تدبیر اۉتکزیلدی.
تدبیرده بیر قطار مدنیت اربابلری، یازووچیلر، ژورنالیستلر، اجتماعي فعاللر، تورکي خلقلر همده افغانستان مهاجرلری جماعه‌لری نینگ وکیللری اشتراک اېتیب، آنه تیلی‌نینگ اۉرنی، تیل نینگ مدني اۉزلیکنی سقلشده‌گی اهمیتی، شونینگدېک، اونینگ جمعیتلر تاریخی و ملت شکللنیشیده‌گی رۉلی حقیده سۉز یوریتیلدی.
سۉزگه چیققنلر آنه تیللرینی اسره‌ب-اوه‌یلش، اولرنی کېله‌جک اولادلرگه یېتکزیش همده اۉزبېک تورکي تیلی و ادبیاتینی قۉللب-قوّتلش ضرورلیگینی تأکیدله‌دیلر. شونینگدېک، آنه تیلینی سقلش مهاجر جماعه‌لرنینگ مدني و ملي اۉزلیگی نینگ مهم قِسمی اېکنی قید اېتیلدی.
محفل نینگ ینه بیر قِسمیده کاناداده آنه تیللرینی قۉللب-قوّتلش تجربه‌سی همده قانونچیلیک اۉرگانلری نینگ تیل خیلمه-خیللیگینی تن آلیش و قۉللب-قوّتلشده‌گی اۉرنی حقیده فکر المشیلدی. ۲۰۰۹-ییلده آنتریا پارلمانیده خلق‌ارا آنه تیلی کونی بیلن باغلیق تشبث نینگ قبول قیلینگنی هم تأکیدلندی.
شونینگدېک، ییغین دوامیده آذربایجان نینگ عنعنوي موسیقی‌لریدن نمونه‌لر اجرا اېتیلدی. موسیقي چیقیشلر اشتراکچیلر تامانیدن ایلیق کوتیب آلینیب، صنعتکارلر قرسکلر بیلن آلقیشلندی. دستور یکونیده افغانستان اوزبیکلری‌نینگ عنعنوي چاپانلری اجراچی صنعتکارلرگه تحفه قیلیندی.
«افغانستانیم، تورکستانیم» نامی آستیده بیر گروه قیزلر نینگ شعر اۉقیشی هم تدبیرگه اۉزگه‌چه روح بغیشلب، اشتراکچیلرنینگ قیزیقیشینی ینه‌ده آشیردی.
تشکیلاتچیلر محفل نینگ اساسي مقصدی اۉزبېک تیلینی اعزازلش، تورکي خلقلر جماعه‌لری‌نینگ مدني صلاحیتینی نمایش اېتیش همده مهاجر اولادلر آره‌سیده آنه تیلینی اسره‌ب-اوه‌یلش مهم‌لیگینی تأکیدلشدن عبارت اېکنینی بیلدیردیلر.
محفل‌نینگ یکوني قِسمیده افغانستان تورکلری نینگ تاریخي و مدني میراثینی قَیته انگلش و اسره‌ب-اوه‌یلش مهم‌لیگی تأکیدلندی. اۉزبېک تورکي تیلی، ادبیاتی و مدنیتینی سقلش بوگونگی اولادنینگ مهم مدني مسوولیتلریدن بیری اېکنی قید اېتیلدی.
ییغین مدني دستورلر همده مهمانلرگه اۉزبېک پلوی و باشقه عنعنوي طعاملر تارتیلیشی بیلن یکونلندی.
