افغانستان‌نینگ بیرلشگن ملتلر تشکیلاتیدهگی دایمي نماینده‌لیگی سرپرستی نصیر احمد فایق انسان حقوقلری ساحه‌سیده مضمونلی ترقیات بۉلمسدن توریب، طالبلر بیلن ملاقات قیلیش بو گروه‌نینگ کمسیتووچی سیاستینی نارمللشتیریش خوفینی توغدیریشینی آگاهلنتیردی.
فایق جمعه کونی (۸ عقرب) بیرلشگن ملتلر تشکیلاتی‌نینگ عمومی ییغیلیشی‌نینگ ۸۱ ییغینیده سۉزله‌گن نطقیده خلق‌ارا همجعیت نینگ طالبلر بیلن ملاقاتی «تمایللرگه اساسلنگن» بۉلیشی کېره‌کلیگینی تأکیدله‌دی.
او شونده‌ی دېدی: «بیز انسان حقوقلری ساحه‌سیده مضمونلی ترقیاتگه اېریشیلمسدن توریب، طالبلر بیلن ملاقات نینگ دوام اېتیشی اولرنینگ کمسیتووچی سیاستینی نارمللشتیریش خوفینی توغدیریشیدن هنوز خواطرده‌میز.»
فایق نینگ ایتیشیچه، ملاقات انیق مېزانلر، اۉلچه‌ب بۉله‌دیگن ترقیات و افغانستان نینگ خلق‌ارا مجبوريتلریگه حرمت اساسیده آلیب باریلیشی کېره‌ک.
او سیاسي ملاقات افغانستان عیاللری و قیزلری‌نینگ اساسي حقوقلری حسابیگه عملگه آشیریلمسلیگی کېره‌کلیگینی تأکیدله‌دی.
بو آره‌ده، پاکستان‌دن تشقری، منطقه دولتلری طالبلر بیلن یقین مناسبتلر اۉرنه‌تگن. روسيه اېسه حتا بو گروهنی رسماً تن آلگن. اروپا اتفاقی هم طالبلرنینگ دیپلوماتیک هیئتینی قبول قیلگن، بیر قطار اروپا دولتلری اېسه تنقیدلرگه قره‌مه‌ی، افغان مهاجرلرینی چیقریب یوباریشده طالبلر بیلن همکارلیکنی دوام اېتتیرماقده.
افغانستان‌نینگ بیرلشگن ملتلر تشکیلاتیدهگی وکیلی دولتلرنی افغان قاچقینلرینی حمایه قیلیشگه و «مجبوري قَیتریب یوبارمسلیک» تمایلیگه رعایه قیلیشگه چقیردی.
نصیر احمد فایق افغانستانده‌گی انسان حقوقلری بحرانینی طالبلر حاکمیتگه کېلگنیدن کېینگی سیاسي بحران بیلن چنبرچس باغلیق دېب بهاله‌دی. اونینگ ایتیشیچه، بو وضعیتدن چیقیش اوچون خلق باشچیلیگیده‌گی سیاسي جریان شکللنیشی کېره‌ک.
فایق بیرلشگن ملتلر تشکیلاتی‌نینگ افغانستان خلقی باشچیلیگیده‌گی سیاسي جریاننی آسانلشتیریشگه چقیردی. اونینگ تأکیدلشیچه، بو جریانده عیاللر، یاشلر، آزچیلیکلر و فقرالیک جمعیتی وکیللری مضمونلی اشتراک اېتیشی، نتیجه‌ده اېسه اینکلیوزیو و حسابدار حکومت شکللنیشی کېره‌ک.
فایق نینگ ایتیشیچه، طالبلرنینگ حربي یۉل بیلن حاکمیتگه قَیتگنیگه بېش ییل بۉلگن بۉلسه-ده، افغانستان خلقی هنوز «حیات نینگ دېیرلی برچه جبهه‌لریگه اره‌لشه‌یاتگن توزوم حکمرانلیگی آستیده» یشه‌ماقده.
او شونده‌ی دېدی: «عیاللر و قیزلر کمسیتیش، اجره‌تیش و نهادینه طرزده چېتله‌تیشگه دوچ کېلماقده. بو انسانیتگه قرشی جنایت علامتلریگه اېگه. اولر تعلیم، محنت و جماعت حیاتیده اشتراک اېتیش امکانیتیدن محروم قیلینگن. بو حالت اولر نینگ قدر-قیمتی، تورموشی و کېله‌جگی اوچون ویرانکار عاقبتلرگه آلیب کېلماقده.»
فایق نینگ تأکیدلشیچه، طالبان نینگ رېپرېسسيه‌سی فقط جندر مسأله‌سی بیلن چېکلنمه‌یدی و عیاللر همده قیزلرگه‌‌گینه تعلقلی اېمس. اونینگ سۉزلریگه کۉره، هزاره‌لر، شیعه‌لر و باشقه آزچیلیک گروهلری، ژورنالیستلر، انسان حقوقلری حمایه‌چیلری، سابق خوفسیزلیک کوچلری خادملری همده طالبانگه قرشی قرشیلیک جبهه‌لری بیلن همکارلیکده عیبلنگن عادي فقرالر اۉزباشیمچه‌لیک بیلن حبسگه آلیش، قییناقلر، مجبوري یۉقالیشلر، مجبوري کۉچیریش و سودسیز قتل اېتیشلرگه دوچ کېلماقده.
افغانستان‌نینگ بیرلشگن ملتلر تشکیلاتیدهگی نماینده‌لیگی سرپرستی نصیر احمد فایق طالبلر «کمسیتووچی فرمانلر، اساسي اېرکینلیکلرگه قۉییلگن چېکلاولر، حقوقي حمایه میکانیزملرینی بېکار قیلیش، قۉرقوو، تهدید و چېتله‌تیش»نی باشقروو واسطه‌لریگه ایلنتیرگنینی ایتدی.
او بیرلشگن ملتلر تشکیلاتی‌نینگ انسان حقوقلری کېنگشی نینگ افغانستانده مستقل تېرگاو میکانیزمینی تشکیل اېتیش بۉییچه یقینده قبول قیلگن قظعنامه‌سینی آلقیشله‌دی. فایق نینگ ایتیشیچه، اوشبو قطعنامه نینگ حقیقي مېزانی فقط اونده‌گی سۉز و جمله‌لر نینگ کوچی اېمس، بلکه اونینگ افغانستان خلقی حیاتیده قنده‌ی اۉزگریش یره‌تیشی بۉله‌دی.
فایق نینگ تأکیدلشیچه، خلق‌ارا همجعیت نینگ چاره‌لری قیزلر مکتبگه قَیته آلگنیده، عیاللر اېرکین ایشله‌ی آلگنیده، جبرلنووچیلر عدالت طلب قیله آلگنیده و یاشلر کېله‌جککه امید بیلن قره‌ی آلگنیده‌‌گینه ثمره‌لی بۉله‌دی.
