طالبلر مطبوعات سوزلاوچیسی ذبیح‌الله مجاهد بو گروه پاکستان بیلن یوزه‌گه کېلگن کېسکینلیکنی «تینچ یۉل بیلن» حل قیلیش اوچون حرکت قیلگنینی، بیراق بو اورینیشلر حاضرگچه نتیجه بېرمه‌گنینی ایتدی. اونینگ تأکیدلشیچه، پاکستان تینچ یۉلنی تنلشگه تیار اېمس.
مجاهد طالبلرگه یقین «حریت» رادیوسیگه بېرگن صحبتیده بو گروه حکومتی کېسکینلیکنی باشله‌مه‌گنینی، عکسینچه، مدافعه موضعیده بۉلگنینی ایتدی.
شو بیلن بیرگه، طالبلر مطبوعات سوزلاوچیسی کېسکینلیکنی تینچ یۉل بیلن حل قیلیش اوچون اوشبو گروه اۉزی‌نینگ سۉنگگی اورینیشلرینی عملگه آشیرگنینی بیلدیردی.
او اَیریم دولتلرنینگ واسطه‌چیلیگی و طالبلر رسميلری بیلن پاکستان اۉرته‌سیده خبرلر المشیلگنی حقیده گپیریب، حاضرگچه «نتیجه بېره‌دیگن انیق یۉل بېلگیلنمه‌گنینی» ایتدی.
طالبلر مطبوعات سوزلاوچیسی پاکستان اۉزی نینگ موفقیتسیز سیاستلریده توریب آله‌یاتگنی و تینچ یۉلنی تنلشگه تیار اېمسلیگینی تأکیدله‌دی.
اونینگ ایتیشیچه، معمانی طالبلر یوزه‌گه کېلتیرمه‌گن و بو گروه مسأله‌نی تینچ یۉل بیلن حل قیلیشنی ایسته‌یدی.
پاکستان و طالبان اۉرته‌سیده‌گی کېلیشماوچیلیک، اوزاق ییللردن بېری بیر-بیریگه اتفاقچی بۉلیب کېلگن ایکّی تامان اۉرته‌سیده، پاکستانده‌گی خوفسیزلیک معمالری و پاکستان طالبلر تحرک طالبان پاکستان (تی‌تی‌پی) کبی گروهلر فعالیتی یوزه‌سیدن دوام اېتماقده.
پاکستان بو گروهلر افغانستانده موجودلیگینی و اۉز هجوملرینی اوشبو مملکت حدودیدن رېجه‌لشتیره‌یاتگنینی ایته‌دی. اسلام آباد بیر نېچه بار طالباندن پاکستان گروهلریگه قرشی چاره کۉریشنی طلب قیلگن. بیراق طالبلر افغانستانده خارجي گروهلر موجودلیگینی انکار اېته‌دی و پاکستانده‌گی خوفسیزلیک معمالرینی هم بو مملکت نینگ ایچکی مسأله‌سی دېب حسابله‌یدی.
پاکستان اوردوسی افغانستانده ترورچی گروهلر نینگ باش‌پناه‌لری دېب حسابله‌یدیگن حدودلرگه بیر نېچه بار هوا هجوملری اویوشتیرگن. بیراق طالبلر و بیرلشگن ملتلر تشکیلاتی بو هجوملر قربانلری تینچ اهالی اېکنینی اَیتماقده.
طالبلر بو هجوملرگه جوابن پاکستان نینگ چېگره پُستلریگه هجوم قیلماقده. اۉتگن ییلدن بویان ایکّی تامان چېگره‌سیده بیر نېچه بار تۉقنه‌شوولر یوز بېرگن.
طالبلر و پاکستان حکومتی اۉرته‌سیده‌گی کېسکینلیک سببلی افغانستان و پاکستان چېگره‌لری یاپیلگن، ایکّی دولت اۉرته‌سیده‌گی سودا اېسه توخته‌تیلگن.
تورکيه و قطر دولتلری‌نینگ طالبلر و پاکستان اۉرته‌سیده‌گی کېسکینلیکنی برطرف اېتیش اوچون قیلگن واسطه‌چیلیگیگه قره‌مه‌ی، ضدیت همان دوام اېتماقده و وقتی-وقتی بیلن ایکّی تامان کوچلری اۉرته‌سیده تۉقنه‌شوولر یوز بېرماقده.
یقینده پاکستان تشقی ایشلر وزیرلیگی مطبوعات سوزلاوچیسی سجادحیدر خان اسلام آباد نینگ طالبلر بیلن مذاکره‌لریده‌گی ترقیات افغانستان حدودیده فعالیت یوریته‌یاتگن ترورچی گروهلرگه قرشی طالبان رسميلری تامانیدن انیق و عملده تېکشیریلیشی ممکن بۉلگن چاره‌لر کۉریلیشیگه باغلیقلیگینی ایتدی.
اونینگ قۉشیمچه قیلیشیچه، پاکستان‌نینگ یگانه طلبی — افغانستان حدودیدن پاکستانگه قرشی ترورچیلیک فعالیتی نینگ تۉلیق توخته‌تیلیشینی کفالتله‌یدیگن، تېکشیریلیشی ممکن بۉلگن میکانیزم یره‌تیشدیر.
بیراق اونینگ ایتیشیچه، «طالبلر رېجیمی بیر قدم آلدینگه و بیر قدم آرقه‌گه تشله‌ماقده».
