بیرلشگن ملتلر تشکیلاتی‌نینگ انسان‌پرورلیک یاردملرنی موافقلشتیریش اداره (اوچا) افغانستانده مبلغ یېتیشمسلیگی سببلی طبیات مرکزلری اۉز خدمتلرینی قیسقرتیریشگه یاکه فعالیتینی توخته‌تیشگه مجبور بۉله‌یاتگنینی بیلدیرگن. عینِ پیتده چېکّه حدودلرده یشاوچی آدملر طبي خدمتلردن فایده‌لنیش اوچون اوزاق و خوفلی یۉللرنی باسیب اۉتیشگه مجبور.
اوشبو تشکیلات شاشیلینچ طبي یاردم کۉرستیش مبلغ اجره‌تیلیشینی کوتیب تورالمسلیگینی تأکیدله‌گن.
اوچانینگ ایتیشیچه، برقرار مبلغ بیلن تأمینلش اساسي طبي خدمتلرنینگ اهالیگه و اولر نینگ یشش جایلریگه یقین حدودلرده موجود بۉلیب قالیشیگه یاردم بېره‌دی.
اوچا معلوماتلریگه کۉره، افغانستانده آزیق-طعام خوفسیزلیگی و تۉییب طعاملنمسلیک حالتلری‌نینگ کوچه‌ییشیدن خواطرلر آرتیب باره‌یاتگن بیر پیتده، مملکتده‌گی آزیقلنتیریش مرکزلری‌نینگ اوچدن بیری مبلغ یېتیشمسلیگی سببلی یاپیلگن.
اوچاکېله‌سی ییلده آلتی یاشگچه بۉلگن تۉرت میلیوندن آرتیق گودک و باله‌گه اۉتکیر تۉییب طعاملنمسلیکنی دوالش اوچون یاردم کېره‌ک بۉلیشیدن آگاهلنتیرگن.
بو حالت افغانستان‌گه کۉرسه‌تیله‌یاتگن خلق‌ارا یاردم کېسکین کمه‌یگن بیر پیتده یوز بېرماقده.
اوچا افغانستانده‌گی ۱۷.۵ میلیون نفر احتیاجمند اهالیگه یاردم کۉرسه‌تیش اوچون ۱.۷میلیارد دالر مبلغ سۉره‌گن، بیراق حاضرگچه بو مبلغ نینگ اتیگی ۳۳ فایزدن سَل کۉپراغی تأمینلنگن.
