«بیرلیک یۉلی» سیاسي جریانی شنبهدن یکشنبهگه اۉتر کېچهسی ایکس ترماغیده افغانستان عیاللرینینگ حالتینی عنعنه، دین، قبیله تفکری و مدرنیزم اۉرتهسیدهگی قرهمه-قرشیلیکلر کانتېکستیده تحلیل قیلیشگه بغیشلنگن ییغیلیش اۉتکزدی.
مذکور ییغیلیشده بیر قطار علمي، مدني و سیاسي ساحه نمایندهلری همده قیزیقیش بیلدیرگن اشتراکچیلر قتنهشیب، افغانستاننینگ بوگونگی وضعیتی، اینیقسه عیاللر دوچ کېلهیاتگن معمالر و چېکلاولر یوزهسیدن فکر المشدیلر.
اشتراکچیلر موضوع نینگ تورلی جهتلرینی محاکمه قیلر اېکن، افغانستان عیاللرینینگ بوگونگی بحرانلی حالتی فقط سیاسي یاکه وقتینچهلیک معما اېمسلیگینی، بلکه ییللر دوامیده شکللنگن تاریخي، اجتماعي عامللر و عنعنوي حاکمیت توزیلمهلرینینگ نتیجهسی اېکنینی تأکیدلهدیلر.
ییغیلیش دوامیده جماعهوي آنگنی یوکسهلتیریش، اجتماعي همجهتلیکنی مستحکملش همده عدالت، اېرکینلیک، تېنگلیک و انسان قدر-قیمتی کبی قدریتلرنی رواجلنتیریش ضرورلیگی علیحده قید اېتیلدی. شونینگدېک، اېتنیک، تیل و سیاسي تفاوتلردن یوقاری توریش عدالتلی و مستحکم جمعیت برپا اېتیش نینگ مهم شرطی اېکنی تأکیدلندی.
اشتراکچیلر افغانستان عیاللرینینگ حالتینی کېنگ کۉلملی انساني بحراننینگ بیر قِسمی صفتیده بهالب، خلقارا همجمعیت همده مسوول ایچکی کوچلرنی اوشبو مسألهگه جدّي اعتبار قرهتیشگه چقیردیلر.
ییغیلیش یکونیده «بیرلیک یۉلی» سیاسي جریانی بوندهی علمي و تحلیلي اوچرهشوولرنی دوام اېتتیریشگه صادق اېکنینی بیلدیریب، عدالت، انسان حقوقلری و انسان قدر-قیمتیگه اساسلنگن غایهلرنی قۉللب-قوّتلش مجبوريتینی ینه بیر بار تصدیقلهدی.
