امریکا قۉشمه ایالتلری جمهور رئیسی اۉرین باسری جېدی ونس ایران بیلن تینچلیک مذاکرهلرینی قَیته باشلش مقصدیده سوئیسنینگ بورگناستوک منطقهسیگه یېتیب باردی.
سوئیس تشقی ایشلر وزیرلیگی یکشنبه کونی معلوم قیلیشیچه، امریکا هیئتی واشنگتن و تهران اۉرتهسیده امضالنگن کېلیشوونی عملگه آشیریش دایرهسیده مذاکرهلر اۉتکزیلهدیگن منزل تامان یۉل آلگن.
ایران هیئتی هم پارلمان رئیسی باشچیلیگیده اوّلراق سوئیسگه یېتیب کېلگن اېدی. تامانلر اۉرتهسیده تخنیکي درجهدهگی مذاکرهلرنینگ بیرینچی باسقیچینی قَیته باشلش رېجهلشتیریلگن.
هر ایکّی دولت اوروشگه برقرار یکون یهسهشگه اینتیلهیاتگن بیر پیتده، هرمز بۉغازی بیلن باغلیق وضعیت و اسرایلنینگ لبناندهگی حربي حرکتلری مذاکرهلر جریانینی مرکّبلشتیرماقده.
ایران اسلام سپاه پاسداران کوچلری شنبه کونی۱۴ بنددن عبارت کېلیشوونینگ بیرینچی بندی بوزیلگنینی دعوا قیلیب، هرمز بۉغازینی یاپگنینی معلوم قیلدی. بیراق امریکا حربيلری تجارت کېمهلری مذکور دېنگیز یۉلهگی آرقهلی حرکتلنیشده دوام اېتهیاتگنینی بیلدیردی.
ایران تامانی اسرایل نینگ لبناندهگی حرکتلرینی تنقید قیلیب، بۉغاز یقینیگه کېلهدیگن کېمهلر خوف آستیده قالیشی ممکنلیگی حقیده آگاهلنتیردی.
اقش مرکزي قوماندانلیگی اېسه شنبه کونی ۵۵ ته تجارت کېمهسی هرمز بۉغازی آرقهلی اۉتگنینی و اولر آرقهلی جهان بازارلریگه 17 میلیون بشکهگه یقین نفت یېتکزیب بېریلگنینی معلوم قیلدی.
ایران رهبریتیگه یقین منبعلر امریکانی کېلیشوونینگ برچه جبههلرده، جملهدن لبنانده هم اۉت آچیشنی تۉختهتیشنی نظرده توتووچی بیرینچی بندینی تۉلیق بجرمهگنلیکده عیبلهماقده.
شو بیلن بیرگه، لبنان مدنی مدافعه خدمتی اسرایل هجوملری عاقبتیده شنبه کونی مملکتده کمیده ۲۰ کیشی هلاک بۉلگنینی معلوم قیلدی. مذکور حادثه صلح اعلان قیلینگنیدن بیر نېچه ساعت اۉتیب صادر بۉلگنی قید اېتیلدی.
