طالبلرنینگ شهرسازلیک ایشلر بۉییچه وزیرلیگینینگ معلوم قیلیشیچه، کابلنینگ کۉتې سنگي منطقهسیده ۲۰-۱۸ مینگ نمازخوان سیغهدیگن کتّه جامع مسجد قوریلیشی رېجهلشتیریلگن.
کۉتې سنگي کابل نینگ غربیده جایلشگن بۉلیب، پایتخت نینگ اېنگ گوجوم منطقهلریدن بیری حسابلنهدی و زمانهوي شهر آستقورمهلریدن محروم اېکنی ایتیلهدی.
طالبلر شهرسازلیک وزیرلیگی یکشنبه کونی (۳۱جوزا) اعلان قیلگن بیاناتیده اوشبو منطقهده جامع مسجد قوریلیشی اوچون توپوگرافیک اۉرگنیش ایشلری عملگه آشیریلگنینی بیلدیرگن.
وزیرلیککه کۉره، اۉتکزیلگن اۉرگنیش نتیجهسیده ۱۸-۲۰ مینگ کیشیلیک مسجد قوریلیشی لایحهسی اوچون ۵۵ مینگ ۳۹۸.۷۱ متر مربع میدان بېلگیلنگن.
شونینگدېک، وزیرلیک تۉپلنگن معلوماتلر باتفصیل رېجه ایشلب چیقیش، لایحهلش اوچون دستلبکی معلوماتلرنی ییغیش همده کېلهجکدهگی حساب-کتابلر اوچون انیق تخنیکي اساس تیارلش مقصدیده فایدهلنیلیشینی قید اېتگن.
طالبان سۉنگگی بېش ییل دوامیده مسجدلر و دیني مدرسهلر قوریلیشیگه علیحده اعتبار قرهتیب کېلماقده.
گروه رهبری هبتالله آخوندزاده ایکّی ییل آلدین کۉپلب عمومی قتناو یۉللر بۉییده مسجدلر قوریش بۉییچه کۉرستمه بېرگن اېدی. بو اېسه افغانستان یۉللری اوزاق ییللیک اوروش و رواجلنیش یېتیشمسلیگی سببلی خوفلی حالتده اېکنیگه قرهمهی عملگه آشیریلگن.
طالباننینگ مسجد قوریلیشیگه اورغو بېریشی یانیده افغانستان اهالیسی قشّاقلیک و آچلیک بیلن کورهشماقده، اهالینینگ یرمی اېسه خلق ارا انسانپرورلیک یاردملرگه قرهم بۉلیب قالماقده.
