طالبلرنینگ صنعت و تجارت وزیری نورالدین عزیزينینگ ایتیشیچه، قازاقستان افغانستانگه اوشبو مملکت آرقهلی آلیب کیریلهدیگن ترانزیت و صادراتی تاورلری اوچون ترانسپورت چېگیرمهلری جاري اېتیشنی وعده قیلگن.
او کابلده قازاقستان هیئتی بیلن اۉتکزیلگن قۉشمه مطبوعات انجمنیده قازاقستان چین و باشقه مملکتلردن افغانستانگه یوک تشیش اوچون مهم ترانزیت یۉنهلیشی بۉلیشی ممکنلیگینی تأکیدلهدی.
عزیزيگه کۉره، قازاقستان افغانستانگه وارد قیلینهدیگن اون و بوغداینی تشیش بۉییچه هم چېگیرمهلر بېریشنی رېجهلشتیرماقده. اونینگ ایتیشیچه، بو چارهلر مملکتده تاورلر نرخینینگ ینه-ده پهسهییشیگه آلیب کېلهدی.
قازاقستان باش وزیری نینگ اۉرینباسری و اقتصاد وزیری سیریک ژومانگارین باشچیلیگیدهگی هیئت کابلگه کېلگن.
مذکور هیئت کېچه طالبلرنینگ یوقاری مرتبهلی وکیللری بیلن اوچرهشوو اۉتکزگن.
طالبان صنعت و تجارت وزیری قازاقستان هیئتی تشریفینینگ اساسي اعتباری دستور و لایحهلرنی عملیاتگه تطبیق اېتیشگه قرهتیلگنینی بیلدیرگن.
وزیرلیکنینگ معلوم قیلیشیچه، اوشبو تشریف دوامیده افغانستان و قازاقستان خصوصي سکتوری اۉرتهسیده۲۵ ته همکارلیک شرطنامهسی امضالنگن.
صنعت و تجارت وزیرلیگی بیاناتیده قید اېتیلیشیچه، بو شرطنامهلر واردات و صادرات، دارو-درمان، ینگی و قوریتیلگن مېوه-سبزواتلر، بانک ساحهسیدهگی همکارلیک، اون، بوغدای، یاغ و کچالو کبی یۉنهلیشلرنی قمرهب آلهدی.
