امریکا جمهور رئیسی اۉرین باسری جیدی ونس سوئیس نینگ بورگناشتوک منطقهسیده ایران بیلن مذاکرهلر باشلنیشیدن بیر نېچه دقیقه آلدین ژورنالیستلرگه شوندهی دېدی: «آلدیمیزده جوده کۉپ ایشلر توریبدی، اما بیز اولرنی بجریشگه تیار و اشتیاقمندمیز.»
اونینگ ایتیشیچه، بوگون باشلنگن جریان تخنیکي مذاکرهلرنینگ باشلنیشی بۉلیب، اونینگ مقصدی برچه کېلیشماوچیلیکلرنی بیردنیگه حل قیلیش اېمس، بلکه تامانلرنینگ اساسي مسألهلرینی انیقلش و اولرنی محاکمه قیلیش اوچون زمین یرهتیشردیر.
ونس شوندهی دېدی: «بوگون گواه بۉلهیاتگنیمیز اصلیده تخنیکي مذاکرهلرنینگ باشلنیشی دیر. بو مذاکرهلر برچه معمالرنی حل اېتمهیدی، اما تاریخده ایلک بار تامانلر بیر جماعه صفتیده بیر چوکی اطرافیده اۉتیریب، هر بیر تامان اوچون اېنگ مهم مسألهلرنی انیقلشی، کېین اېسه اولرنی محاکمه قیلیب، یېچیم تاپیشی و یخشیراق کېلهجک سری قدم تشلشیگه امکان بېرهدی.»
امریکا جمهور رئیسی اۉرین باسری اوّلا اوشبو تخنیکي مذاکرهلر اوچون مستحکم اساس یرهتیش ضرورلیگینی تأکیدلهدی. اونینگ سۉزلریگه کۉره، مذاکره گروهلری تۉلیق سیاسي قۉللب-قوّتلاوگه اېگه بۉلیشی و تۉسیقلرنی یېنگیب اۉتیشده رهبریتگه تهیهنیشی ممکنلیگینی بیلیشی کېرهک.
ونس، شونینگدېک، شوندهی دېدی: «هرمز بۉغازی نینگ آچیق قالیشی و ایران هستوي دستوری نینگ یکونلنیشی اوّلدن اېریشیلگن نتیجهلردیر. اېندی سوال شوندهکی، بیز همکارلیک آرقهلی ینه قندهی ینگی یوتوقلرگه اېریشه آلهمیز. یقین شرقدهگی مناسبتلرنی بوتونلهی اۉزگرتیره آلهمیزمی یاکه اوّلگی اصوللرگه قَیتهمیزمی؟ بو بیز ایستهمهیدیگن یۉل، اما بوندهی حالت یوز بېریشی ممکن.»
او قطر، پاکستان و اسرایل نینگ منطقوي تینچلیککه اېریشیش یۉلیده سعی-حرکت قیلهیاتگنینی هم قید اېتدی. شو بیلن بیرگه، اَیریم حاللرده بو مقصدگه قندهی اېریشیش بارهسیده فکر فرقلری بۉلیشی ممکنلیگینی ایتدی.
ونس لبناندهگی وضعیت حقیده هم فکر بیلدیریب: «مېن لبناندهگی وضعیتگه نسبتاً جوده ایجابي قرهیمن. حلی بجریلیشی کېرهک بۉلگن ایشلر کۉپ، اما بیز سعی-حرکتلریمیزنی دوام اېتتیرهمیز»، دېدی.
« اجلاس درچه لوسرن» نامی بیلن اۉتهیاتگن ایران و امریکا اۉرتهسیدهگی تخنیکي مذاکرهلر بیر نېچه دقیقه آلدین پاکستان و قطر واسطهچیلیگیده باشلندی.
بو جاري ییل نینگ 19 حمل کونی اعلان قیلینگن صلحدن کېین ایکّی دولت اۉرتهسیده اۉتکزیلهیاتگن ایکّینچی تۉغریدن-تۉغری مذاکرهلر همده اوروشنی یکونلش بۉییچه کېلیشوو الکترون طرزده امضالنگنیدن کېینگی ایلک مذاکرهلر حسابلنهدی.
