ایران و امریکا اۉرتهسیدهگی مذاکرهلر سوئیسده دوام اېتهیاتگن بیر پیتده، امریکا قۉشمه ایالتلری جمهور رییسی دونالد ترامپ ایرانگه لبناندهگی اۉزینینگ نیابتی کوچلرینی جلولش حقیده آگاهلنتیریش بېردی.
امریکا جمهور رییسی اجتماعي ترماقده نشر قیلگن پُستیده تهدید قیلیب شوندهی دېدی:
«اگر بو ایش قیلینمسه، بیز ینه ایرانگه قتّيق ضربه بېرهمیز؛ خودّی اۉتگن هفته قیلگنیمیزدېک، لېکن بو سفر ینه-ده کوچلیراق!!!»
ترامپ ایراننی ینه بامباردمان قیلیش بیلن تهدید قیلهیاتگن بیر پیتده، سوئیسنینگ بورگناشتوک شهریده اونینگ نمایندهلری و ایران هیئتی اۉرتهسیده مذاکرهلر دوام اېتماقده.
امریکا جمهور رئیسی اۉرین باسری جیدی ونس مذاکرهلر باشلنیشیدن آلدین سوئیسده سۉزگه چیقیب، ترامپ حکومتی یقین شرقده تینچلیککه صادق اېکنینی ایتدی. او لبنان وضعیتیگه نسبتاً جوده ایجابي فکرده اېکنینی هم بیلدیردی.
ایران و امریکا اۉرتهسیدهگی کېلیشووگه کۉره، اوروش برچه جبههلرده، جملهدن لبنانده هم تۉختشی کېرهک اېدی، اما اوشبو کېلیشوو امضالنگندن سۉنگ هم اسرایلنینگ جَنوبي لبنانگه هجوملری دوام اېتماقده.
ایران اېسه اسرایلنینگ لبنانگه هجوملرینی امریکا بیلن توزیلگن کېلیشوونینگ بوزیلیشی دېب حسابلهیدی و مذاکرهلرنی دوام اېتتیریش اوچون هجوملرنی تۉختهتیشنی طلب قیلماقده.
