بیرلشگن ملتلر تشکیلاتینینگ انسانپرورلیک یاردملرنی موافقلشتیریش اداره (اوچا) جاري ییلده۱۶ میلیون کیشی سوو و شخصي ساغلیق خدمتلریدن فایدهلنیش اوچون یاردمگه محتاج اېکنینی معلوم قیلدی.
اوچانینگ افغانستاندهگی نمایندهلیگی بوگون (دوشنبه،۱-سرطان) ایکس اجتماعي ترماغیده نشر قیلگن خبریده، سوو تنقیص بۉلگنده کوندهلیک حیات اۉزگریب کېتیشینی تأکیدلهدی.
مذکور تشکیلاتگه کۉره، سوو یېتیشماوچیلیگی یوزهگه کېلگنده، «عایلهلر تازه ایچیملیک سووی ایزلشگه مجبور بۉلهدی، بالهلر ساغلیق اوچون کۉپراق خوف-خطرلرگه دوچ کېلهدی و جماعهلر بو شرایطگه ماسلشیشگه حرکت قیلهدی».
اوچانینگ قۉشیمچه قیلیشیچه،۲۰۲۶-ییلده افغانستان بۉیلب تخمیناً 16 میلیون کیشی یاردملریگه محتاج بۉلهدی.
ضرور یاردملر قطاریگه تازه سوو بیلن تأمینلش، ستندرد سنیتاريه خدمتلری، جملهدن، معیاري حاجتخانه(تشناب)لردن فایدهلنیش و آقاوه سوولرنی خوفسیز طرزده یۉق قیلیش کیرهدی.
بوندن آلدین بیرلشگن ملتلر تشکیلاتی نینگ باشقه تشکیلاتلری، جملهدن یونیسف هم افغانستانده ۱۵-۱۶میلیون کیشی، یعنی اهالی نینگ اوچدن بیر قِسمیدن کۉپراغی تازه ایچیملیک سوویگه اېگه اېمسلیگینی بیلدیرگن اېدی. شونینگدېک،۹.۴میلیون کیشی معیاري سنیتاريه خدمتلریدن۱۵ میلیون کیشی اېسه شخصي ساغلیق اوچون ضرور بۉلگن سوو و صابوندن فایدهلنیش امکانیتیگه اېگه اېمس.
