کاناداده یشاوچی اۉنلب افغانستانلیک مهاجرلر اوتاوا شهریده ناراضیلیک نمایشی اۉتکزیب، خلقارا همجعیتدن افغانستان عیاللری و قیزلرینی قۉللب-قوّتلش بۉییچه عملي چارهلر کۉریشنی طلب قیلدی.
ناراضیلیک نمایشی یکشنبه کونی (۳۱-جوزا) کانادا پارلمانی بناسی مقابلیده بۉلیب اۉتدی.
تدبیر تشکیلاتچیلری قبول قیلگن قطعنامهده خلق ارا همجعیتدن افغانستان عیاللری و قیزلرینی حمایه قیلیش اوچون «عملي، زودلیک بیلن عملگه آشیریلهدیگن و ثمرهلی چارهلر» کۉریش سۉرهلگن.
اولر خلقارا همجعیتدن، اینیقسه کانادادن، طالباننی انسان حقوقلری، عیاللر حقوقلری و خلق ارا مجبوريتلرگه رعایه قیلیشگه مجبور اېتیش اوچون برچه قانوني سیاسي و حقوقي واسطهلردن فایدهلنیشنی طلب قیلدیلر.
نمایشچیلرنینگ تأکیدلشیچه، «بوگون افغانستانده میلیونلب عیاللر و قیزلر جنایت صادر اېتگنی اوچون اېمس، بلکه فقط عیال بۉلگنی سببلی اېنگ عادي انساني حقوقلریدن محروم اېتیلگن».
مهاجرلر طالبان تامانیدن جبریل منطقهسیده عیاللرنینگ مدنی حقوق طلب قیلووچی ییغینلری زۉرآورلیک بیلن باستیریلگنینی اېسلهتیب، بوندهی حرکتلر عیاللرگه قرشی قرهتیلگن «مقصدلی و ایکّی کرّه ظلم» نینگ بیر قِسمی اېکنینی بیلدیردیلر.
نمایش اشتراکچیلری افغانستاندهگی وضعیتنی «جنسی آپارتاید» صفتیده تن آلیشنی طلب قیلدیلر همده خلقارا همجعیت نینگ اَیریم دایرهلری تامانیدن طالبان تیزیمینی تن آلیشگه قرهتیلگن اورینیشلردن خواطر بیلدیردیلر.
اولر شوندهی تأکیدلهدیلر: «ظلمگه سکوت سقلش، کمسیتیشلرگه نسبتاً بېطرف قالیش و انسان حقوقلرینی بوزووچیلر بیلن مُراضات قیلیش نه تینچلیککه، نه برقرارلیککه آلیب کېلهدی. عکسینچه، بو عدالتسیزلیک، عذاب-عقوبت و انسانلر اوچون ینه-ده کۉپراق قییناقلر نینگ کېنگهییشیگه سبب بۉلهدی.»
هرات نینگ جبریل حدودیده عیاللر و قیزلرنینگ حبسگه آلینیشی همده خلق ناراضیلیکلرینینگ باستیریلیشیدن سۉنگ، دنیانینگ تورلی مملکتلریدهگی افغانستان مهاجرلری نینگ طالبانگه قرشی گلوبل ناراضیلیکلری کوچهیگن.
سۉنگّی هفتهلرده اروپانینگ تورلی دولتلریدهگی اۉندن آرتیق شهرده افغانستان مهاجرلری ناراضیلیک تدبیرلرینی اۉتکزیب، خلقارا همجعیتدن طالبلرنینگ عیاللرگه نسبتاً تاباره کوچهییب بارهیاتگن چېکلاولرینی تۉختهتیش اوچون عملي چارهلر کۉریشنی طلب قیلماقده.
