بیرلشگن ملتلر تشکیلاتینینگ افغانستاندهگی انسان حقوقلری بۉییچه مخصوص گزارشگلری ریچارد بنت طالبان نمایندهلرینی بروکسلگه چقیریش و اروپا رسميلری بیلن اوچرهشوو اۉتکزیشنی افغانستان خلقی، اینیقسه عیاللر اوچون «حقارت» دېب اتهدی.
اروپا کمیسیونی مهاجرلر مسألهلری بۉییچه همکارلیک قیلیش و اروپادن افغانستان مهاجرلرینی دېپورت قیلیش جریانینی یېنگیللشتیریش مقصدیده طالبلر هیئاتینی بروکسلگه چقیرگن.
بو قرار کېنگ تنقیدگه سبب بۉلگن.
ریچارد بنت بوگون (دوشنبه، ۱-سرطان) ایکس اجتماعي ترماغیده یازگن: «بروکسلده طالبلر بیلن اوچرهشوو افغانستانلیکلر، اینیقسه عیاللر اوچون حقارت بۉلهدی.»
او اروپادن مهاجرلرنی تېزلشتیریلگن ترتیبده چیقریب یوباریشنی هم تنقید قیلیب، انسان حقوقلری و قاچقینلر قانونیگه رعایه قیلیش ضرورلیگینی تأکیدلهگن.
بنتنینگ فکریچه، «افغانستانلیکلر خوفسیز بۉلمهگن وضعیتگه قَیتریلمسلیگی کېرهک».
فولکر تورک هم اروپا اتفاقینینگ ینگی قاعدهلرینی تنقید قیلگن. او بو قاعدهلر تېزکار دېپورتنی آسانلشتیریشیدن خواطر بیلدیرگن.
اونینگ بیاناتیده ایتیلیشیچه: «بیز اروپا اتفاقی نینگ مهاجرلر و باشپناه ایزلاوچیلرنی تېزکار دېپورت قیلیش امکانینی بېرووچی ینگی قاعدهلر قبول قیلینگنیدن چوقور افسوسدهمیز.»
او انسان حقوقلری و قاچقینلر قانونلریگه قطعی رعایه قیلیشگه چقیرگن.
اروپا دولتلری حاضر باشپناه عریضهسی رد اېتیلگن مهاجرلرنی دېپورت قیلیشنی کوچهیتیریشگه حرکت قیلماقده.
اۉتگن آی اورپا کمیسیونی طالبلرگه تېگیشلی هیئاتنی مهاجرلرنی چیقریب یوباریش بۉییچه تخنیکي مذاکرهلر اوچون بروکسلگه چقیرگنینی تصدیقلهگن.
یقینده اېسه بلجیم حکومتی طالبان هیئاتی اعضالریگه ویزه بېریش مسألهسینی کۉریب چیقهیاتگنینی معلوم قیلگن.
