امریکا قۉشمه ایالتلری جمهور رئیسی اۉرین باسری جیدی ونس سوئیسده ایران بیلن اۉتکزیلگن مذاکرهلر یخشی نتیجه بېرگنینی و ایران نمایندهلری اتم انرژی خلق ارا آژانسی بازرسلرینینگ مملکتگه قَیتیشیگه راضی بۉلگنینی معلوم قیلدی.
امریکا جمهور رئیسی اۉرین باسری بوگون (دوشنبه، ۱-سرطان) سوئیسده اۉتکزیلگن مطبوعات انجمنیده شوندهی دېدی:
«بو امریکا خلقی اوچون کتّه بوریلیش نقطهسی و ایران نینگ هستوي قورال دستورینی بوتونلهی توگهتیش همده دایمي هستوي قورالسیزلنیش یۉلیدهگی ایلک قدم دیر.»
بیراق ایران رسميلری حاضرچه بو معلوماتنی تصدیقلهمهگن. اولرنینگ ایتیشیچه، سوئیس مذاکرهلری اوروشنی یکونلش بۉییچه امضالنگن کېلیشوو اجراسینی محاکمه قیلیشگه بغیشلنگن بۉلیب، اونده ایران نینگ هستوي دستوری محاکمه قیلینمهگن.
جیدی ونس ایراننینگ موزلهتیب قۉییلگن مبلغلرینی آزاد قیلیش مسألهسیگه هم تۉختهلیب، امریکا بو مبلغلر تروریزمنی مالیهلشتیریش اوچون اېمس، بلکه ایران خلقیگه یاردم بېریش اوچون صرفلنیشینی تأمینلهیدیگن میکانیزم یرهتماقچی اېکنینی ایتدی.
اونینگ سۉزلریگه کۉره، کېینچهلیک اوشبو مبلغلر امریکا دهقانلریدن مکهجواری، سایه و بوغدای خرید قیلیش اوچون ایشلهتیلهدی.
ونس بو حقده گپیرر اېکن: «بو جوده یخشی و ترامپ اسلوبیدهگی کلاسیک کېلیشوودیر،» دېدی.
امریکا جمهور رئیسی اۉرین باسری، شونینگدېک، هرمز آچیق اېکنینی و هر قندهی ماجرالر یوز بېرگن تقدیرده هم اوشبو مهم دېنگیز یۉلی آچیق قالیشینی تأمینلهیدیگن میکانیزم اوستیده ایش آلیب بارهیاتگنلرینی بیلدیردی.
ایران و سوئیس کېچه سوئیسنینگ بورگناشتوک قرارگاهیده اوروشنی یکونلش بۉییچه کېلیشوو اجراسی یوزهسیدن بیرینچی تخنیکي مذاکرهلرنی اۉتکزگن اېدی.
مذاکرهلرده عباس عراقچی، ایران تشقی ایشلر وزیری، «نفت و نفت-کیمیا محصولاتلری اېکسپورتیگه قۉییلگن چېکلاولر تۉختهتیلدی همده دېنگیز قملی بېکار قیلیندی»، دېب معلوم قیلگن.
او، شونینگدېک، موزلهتیلگن اَیریم مبلغلر آزاد قیلینگنینی و ایران نینگ اقتصادي تیکلنیشی همده ترقیاتیگه قرهتیلگن ییریک دستور عملگه آشیریلهیاتگنینی قۉشیمچه قیلگن.
