انسان حقوقلر تشکیلاتی اروپا اتفاقی دولتلری طالبلرنی بروکسلگه چقیریش آرقهلی اۉز آبرو-اعتباریگه ضرر یېتکزهیاتگنینی بیلدیردی.
تشکیلات نینگ افغانستان بۉییچه تدقیقاتچیسی فرشته عباسی بوگون (۱-سرطان) اعلان قیلینگن بیاناتیده شوندهی دېگن: «اروپا اتفاقی دولتلری بیر تاماندن طالبلرنینگ انسان حقوقلرینی بوزیشینی قارهلب، اولرنی جوابگرلیککه تارتیشگه چقیرماقده، باشقه تاماندن اېسه افغانلرنی مجبوري دېپورت قیلیش اوچون طالبلر بیلن همکارلیک قیلماقده. بو اېسه اولرنینگ ایشانچلیلیگی و آبروسیگه پوتور یېتکزهدی.»
فرشته عباسی هر قندهی ملاقات و همکارلیکده انسان حقوقلری حمایهسی همده جوابگرلیک مسألهلری اوستوار بۉلیشی کېرهکلیگینی تأکیدلب، آدملرنی حیاتی و خوفسیزلیگی خوف آستیده بۉلگن جایگه قَیتریش تۉغری اېمسلیگینی ایتدی.
انسان حقوقلری تشکیلاتی بیاناتیده قید اېتیلیشیچه، اروپا دولتلری افغانستاندهگی آغیر انسان حقوقلری وضعیتیدن خبردار بۉلیشیگه قرهمهی، دېپورتلرنی تېزلشتیریش رېجهلری اوستیده ایشلهماقده.
اورپا کمیسیونی اوّلراق طالبان نینگ تخنیکي هیئاتینی افغانستان مهاجرلرینی دېپورت قیلیش مسألهسینی محاکمه اېتیش اوچون بروکسلگه تکلیف قیلگنینی تصدیقلهگن اېدی.
انسان حقوقلر تشکیلاتی معلوماتیگه کۉره، اوشبو طالبان هیئاتی نینگ بروکسلگه سفری یقین کونلرده عملگه آشیریلیشی کوتیلماقده.
طالبان نینگ بروکسلگه تکلیف اېتیلیشی کېنگ اعتراضلرگه سبب بۉلگن. جملهدن، ریچارد بنت، بیرلشگن ملتلر تشکلیاتی نینگ افغانستان بۉییچه مخصوص گزارشگلری، بونی افغانستان عیاللریگه نسبتاً حقارت دېب بهالهگن.
