ملاله یوسفزی، تینچلیک بۉییچه نوبل مکافاتی ساورینداری و انسان حقوقلری فعالی، اروپا اتفاقی نینگ طالباننی بروکسلگه چقیریلیش قرارینی تنقید قیلیب، اروپا دنیادهگی اېنگ یامان انسان حقوقلری انقراضلریدن بیری اوچون مسوول بۉلگن رژیمنی قانونيلشتیرمسلیگی کېرهکلیگینی ایتدی.
یوسفزي اۉز پیامیده طالبان عملدارلری نینگ بروکسلگه تکلیف چقیریلگنیدن «تأثیرلنگن و چوقور تشویشگه توشگنینی» بیلدیردی.
اونینگ ایتیشیچه، طالبان قیزلرنی اۉرته مکتبلرگه باریشدن محروم قیلهیاتگن و اولرنی مجبوري نکاحگه اوندهیاتگن گروه دیر.
یوسفزي هراتده عیاللر و قیزلرنینگ کيینیش اسلوبی سببلی حبسگه آلینهیاتگنیگه اشاره قیلیب، طالبلر«گپیریشگه یاکه بو گروهگه قرشی چیقیشگه جرعت قیلگن عیاللرنی حبسگه آلیشی، کلتکلشی و قتل اېتیشینی» تأکیدلهدی.
اونینگ سۉزلریگه کۉره، طالبلر اۉزی نینگ جنسی آپارتاید تیزیمی آرقهلی عیاللر و قیزلرنی جماعت حیاتیدن بوتونلهی چېتلهتگن.
یوسفزي شوندهی دېدی: «اروپا دنیادهگی اېنگ آغیر انسان حقوقلری بحرانلریدن بیری اوچون مسوول بۉلگن رژیمنی قانونيلشتیرمسلیگی کېرهک. طالبان بیلن هر قندهی ملاقات افغانستان عیاللری و قیزلری نینگ حقوقلری بیلن باشلنیشی و شو بیلن یکونلنیشی لازم.»
خبرلرگه کۉره، بوگون (سهشنبه، 2-سرطان) طالبان هیئاتی بروکسلگه باریشی رېجهلشتیریلگن.
اروپا کمیسیونی تکلیفی بیلن عملگه آشیریلهیاتگن اوشبو سفرنینگ مقصدی افغانستان قاچقینلرینی دېپورت قیلیش مسألهسی یوزهسیدن مذاکرهلر اۉتکزیش دېب بیلدیریلگن.
طالبلر نینگ اروپاگه تکلیف قیلینیشی کېنگ کۉلملی سلبي عکسالعمللرگه سبب بۉلگن.
