طالبلر ایچکی ایشلر وزیرلیگی سۉزلاوچیسی عبدالمتین قانعنینگ معلوم قیلیشیچه، کېچه تونده کابل شهرینینگ مندوي بازاریده یوز بېرگن یانغین برق ترماغیدهگی قیسقه توتهشوو سببلی کېلیب چیققن و نتیجهده سکّیزته دوکان یانیب کېتگن.
قانع بوگون ایکس اجتماعي ترماغیده نشر قیلگن بیاناتیده، حادثه دوشنبه کونی (۱-سرطان) کېچقورون کابلنینگ بیرینچی ناحیهسیدهگی مندوي بازاریده جایلشگن «زرداد» مارکیتیده صادر بۉلگنینی ایتدی.
اونینگ سۉزلریگه کۉره، اوشبو مارکیتده ۲۰۵ ته دوکان و ۳۰۰ ته انبارنی اۉز ایچیگه آلگن ۵۰۰ دن آرتیق سودا نقطهلری موجود.
قانع یانغین عاقبتیده سکّیزته دوکان ضرر کۉرگنینی، بیراق اۉت اۉچیرووچیلر گروهینینگ تېزکار حرکتی طفیلی قالگن ۴۹۷ ته دوکان و انبار سقلب قالینگنینی تأکیدلهدی.
طالبلر ایچکی ایشلر وزیرلیگی سۉزلاوچیسی نینگ ایتیشیچه، حادثه نتیجهسیده قریب ۸ میلیون افغاني مقداریده مادّي ضرر یېتگن. شو بیلن بیرگه، اۉت اۉچیرووچیلر نینگ سعی-حرکتلری طفیلی تخمیناً ۴۸۰ میلیون افغانيلیک تاور و ملک یانغیندن قوتقریب قالینگن.
دستلبکی تېکشیروولرگه کۉره، یانغین نینگ اساسي سببی برق سیملریدهگی قیسقه توتهشوو بۉلگن.
کابلدهگی مندوي بازاری شهرنینگ اېنگ گوجوم سودا مرکزلریدن بیری همده اولگورجی سودانینگ اساسي مرکزی حسابلنهدی. بو بازار اوّل هم بیر نېچه بار برق تیزیمیدهگی ناسازلیکلر طفیلی یانغینلرگه گواه بۉلگن.
سۉنگّی شوندهی حادثه اۉتگن هجري-شمسي ییل نینگ قوس آییده صادر بۉلیب، «میر علم بوت فروشلیک سرایی» برق قیسقه توتهشووی عاقبتیده یانیب کېتگن اېدی. اۉشنده سکّیزته دوکان و اۉنته انبار یانغینده ضرر کۉریب، قریب ۷۰۰ مینگ اقش دالری مقداریده ضرر یېتگن.
مندوي بازاری تدبیرکارلری و سوداگرلری یانغینلرنینگ تکرارلنیشیگه برق تأمیناتی نینگ ترتیبسیزلیگی، بازارلردهگی برق تیزیملرینینگ اېسکیرگنی و ستندردلرگه جواب بېرمسلیگی سبب بۉلهیاتگنینی تأکیدلهماقده. اولر بونی اۉز سرمایهلری اوچون اېنگ کتّه تهدیدلردن بیری دېب حسابلهیدیلر.
