رویترز اخبارات آژانسی اۉز منبعلریگه تهیهنیب خبر بېریشیچه، بلجیم طالبلر هیئاتینینگ بېش نفر اعضاسیگه بروکسلگه کیریش اوچون بیر کونلیک ویزه بېرگن.
رویترزنینگ یازیشیچه، طالبلر دیپلوماتلری نینگ بروکسلگه قچان یېتیب باریشی انیق اېمس، بیراق بو بوگون، سهشنبه کونی (۲-سرطان) بۉلیشی احتمالدن خالی اېمس.
طالبلر حاضرچه اوشبو هیئت نینگ بروکسلگه سفری حقیده رسمي بیانات بېرمهگن.
بیراق کېچه اَیریم محلي یېتکرمهلر طالبلرنینگ بېش کیشیلیک هیئاتی اروپا کمیسیونی بیلن اۉتکزیلهدیگن ییغیلیشده قتنهشیش اوچون سهشنبه کونی تورکيهدن بلجیمگه یۉل آلیشی حقیده خبر بېرگن اېدی.
خبرلرگه کۉره، هیئتگه طالبان تشقی ایشلر وزیرلیگی مطبوعات سۉزلاوچیسی عبدالقهار بلخی رهبرلیک قیلماقده. شونینگدېک، وزیرلیک علاقهلر باشقرمهسی رهبری اۉرینباسری هدایتالله پکتین هم هیئت ترکیبیدن اۉرین آلگن.
اروپا کمیسیونی مطبوعات سۉزلاوچیسی مارکوس لامرت طالبلر هیئاتینینگ بروکسلگه تشریفی حقیده گپیرر اېکن، اولر افغانستانگه مهاجرلرنی دېپورت قیلیش جریانینی یېنگیللشتیریش بۉییچه تخنیکي ملاقاتده قتنهشیش اوچون تکلیف اېتیلگنینی ایتدی.
اونینگ سۉزلریگه کۉره، اروپا اتفاقیگه اعضا دولتلر آغیر جنایتلر صادر اېتگن و خوفسیزلیککه تهدید سالیشی ممکن بۉلگن مهاجرلرنی آرتگه قَیتریش یۉللرینی کۉریب چیقماقده.
مارکوس لامرت شو سببلی طالبان بیلن «تخنیکي ملاقاتلر» باشلنگنینی تأکیدلهدی.
بیراق طالبلرنینگ بروکسلگه تکلیف قیلینیشی و اروپا کمیسیونینینگ اولر بیلن تۉغریدن-تۉغری مذاکره اۉتکزیشی کېسکین تنقیدلرگه سبب بۉلگن.
انسان حقوقلری تشکیلاتلری بوندهی علاقهلرنی طالبانگه سیاسي لېگیتیملیک بېریشگه خدمت قیلووچی قدم و افغانستان خلقی، اینیقسه عیاللرگه نسبتاً حرمتسیزلیک دېب بهالهماقده.
جملهدن، بیرلشگن ملتلر تشکیلاتی افغانستان بۉییچه مخصوص خبرچیسی ریچار بنت کېچه اعلان قیلگن بیاناتیده طالباننی اروپاگه تکلیف قیلیش و بروکسلده گروه وکیللری بیلن اوچرهشیش «افغانستان خلقی، اینیقسه عیاللر اوچون حقارت» بۉلیشینی تأکیدلهگن.
